Ажил хийж буй хүн шүүмжлүүлдэг гэдэг үг байдаг. Д.Сарангэрэл сайд тандалт судалгаа хийсэн учраас л сүрьеэгээр өвчлөгсөд олон байгааг илрүүлжээ. Энэ тухайгаа ч тэрээр “Эрүүл мэндийн даатгалын сангаас санхүүжүүлэн 2018 оны аравдугаар сарын 1-нээс эхлэн орон даяар анх удаа эрүүл мэндийн урьдчилан сэргийлэх үзлэг хийж байна. Үзлэгээр сүрьеэгийн тархалт түлхүү бүртгэгдэж байгаа. 18-34 насныхан болон ЕБС-ийн сурагчдын дунд сүрьеэгийн урьдчилан сэргийлэх үзлэгийг газар дээр нь хийж байна. Тандалт судалгааг 90 сургуульд хийхээс өнөөдрийн байдлаар 25 сургуульд хийж, сүрьеэгийн өвчлөлийн 47 тохиолдлыг илрүүлж эмчиллээ. Тандалт судалгааг үргэлжлүүлэн хийнэ” хэмээн мэдэгдсэн.
Гэтэл үүнийг нь Д.Сарангэрэл сайд өөрөө сүрьеэ өвчин тараагаад байгаа мэтээр л цуурцгааж байна. Харин ч түүний өмнөх сайд нар ийм нөхцөл байдал үүсчихээд байхад дараад байсан хэрэг биш үү. Ил болгочихвол өөрт нь шавар шавхай ирээд наалдчихна гэж санасан байх л даа. Харин сэтгүүлч хүн бол өөр. Сэтгүүлч хүн асуудлыг ил болгодог. Тиймдээ ч Д.Сарангэрэл сайд сүрьеэгийн нөхцөл байдлыг бодитоор нь гаргаж тавьсан. Цаашид ч энэ мэтчилэнгээр сүрьеэг илрүүлж, энэ асуудлыг нэгмөсөн цэгцэнд оруулах ёстой. Бүр ор мөргүй дарж авахын төлөө хичээх хэрэгтэй. Сургуулиуд ч тэр дор бүрнээ анхаарч, үзлэг шинжилгээнд идэвхтэй хамрагдах шаардлагатай юм.
Ингэж сүрьеэгийн тархалт их байгааг илрүүлж байхад нь олон нийт шүүмжиллээ гээд өнөөх сайдаа огцруулж тэнэгтэв ээ. Д.Сарангэрэл сайд ч тэр хулчийж огцрох өргөдлөө өгөв дөө. Харин ч энэ үйлдэл дараа дараагийн сайд нарт болж бүтэхгүй бүхнээ нууж далдлах шаардлагагүй юм байна, ил болгоё гэх урам зориг болог. Одоо дахиад ч бугшсан зүйлүүдээ ил болгох хэрэгтэй. Өсвөр үе, залуучуудын дунд ихээр дэгдлээ гэгдээд буй тэмбүүгээс эхлээд бэлгийн замын бүхий л өвчлөлүүдийг яг үүн шиг ил болгож байгаад дарж авах нь чухал байна.
Сэтгэгдэл бичих