Аймгийн арслан Н.Өсөхбаяр-ын допингийн маргаан шинэ шатанд шилжиж, улсын гарди цолыг нь сэргээх боломж үүсэж болзошгүй нөхцөл байдал бүрдээд байна. Тодруулбал, түүний дасгалжуулагч Ц.Хосбаяр дархлаа дэмжих тариа нэрээр хориотой бодис өгсөн байж болзошгүй хэрэгт холбогдон шалгагдаж, шүүхийн шийдвэрийг хүлээж байгаа аж.
Өнгөрсөн жилийн Үндэсний их баяр наадмын дараа авсан допингийн шинжилгээгээр нэр бүхий бөхчүүдээс хориотой бодис илэрсний дотор Н.Өсөхбаяр багтсан бөгөөд үүний дагуу түүний улсын гарди цолыг хураах шийдвэр гарсан юм. Харин тэрбээр уг шийдвэрийг эсэргүүцэн Үндэсний спортын арбитрт гомдол гаргаад байгаа бөгөөд маргааныг шийдвэрлэх хуралдаан дөрөвдүгээр сарын 9-ний 10:00 цагт болохоор товлогджээ.
Н.Өсөхбаяр өөрийн байр сууриа илэрхийлэхдээ допингийн шинжилгээнд хориотой бодис илэрснийг үгүйсгээгүй ч санаатайгаар хэрэглээгүй, гуравдагч этгээдийн нөлөө байж болзошгүй гэж үзэж байгаагаа мэдэгдсэн байна. Хэрэв шүүх болон арбитрын байгууллагаас дасгалжуулагчийн буруутай үйлдэл, өөрөөр хэлбэл тамирчинд санаатайгаар хориотой бодис хэрэглүүлсэн нь тогтоогдвол түүний цолыг сэргээх эрх зүйн үндэслэл бүрдэх боломжтой юм.
Түүнчлэн энэ хэрэг нь зөвхөн нэг тамирчны асуудал бус, спортын салбар дахь допингийн хяналт, дасгалжуулагчдын ёс зүй, тамирчдын эрх ашгийг хамгаалах тогтолцооны сул талыг хөндөж буй томоохон асуудал болоод байна. Иймд удахгүй болох арбитрын шийдвэр нь зөвхөн Н.Өсөхбаярын хувь заяанд төдийгүй Монголын үндэсний бөхийн спортын орчинд цаашид баримтлах бодлого, хариуцлагын жишигт чухал нөлөө үзүүлэхээр байна.
Сэтгэгдэл бичих