Улсын Их Хурлын Эдийн засгийн байнгын хорооны өнөөдрийн хуралдаанаар Монгол Улсын эрчим хүчний салбарт хэрэгжих томоохон төслүүд болон олон улсын хэлэлцээрийн асуудлыг хэлэлцэн шийдвэрлэлээ.
Хуралдаанаар Монгол Улс болон Олон улсын сэргээн босголт, хөгжлийн банк хооронд байгуулах “Эрчим хүч-4” төслийн зээлийн хэлэлцээрийн төслийг хэлэлцэж, гишүүдийн 59.1 хувийн саналаар дэмжив. Улмаар санал дүгнэлтийг УИХ-ын Аюулгүй байдал, гадаад бодлогын байнгын хороонд хүргүүлэхээр болов.
Төслийн хүрээнд Мандалговь–Арвайхээр чиглэлд 220 кВ-ын хоёр хэлхээт, нийт 287 км урт цахилгаан дамжуулах агаарын шугам барих, мөн дэд станцуудыг өргөтгөх ажлыг хэрэгжүүлэх юм. Энэхүү төслийг 78 сая ам.долларын зээлийн хөрөнгөөр санхүүжүүлнэ.
Төсөл хэрэгжсэнээр Архангай, Өвөрхангай, Баянхонгор аймгуудын Хангайн бүсийн 50 мянга гаруй хэрэглэгчийг эрчим хүчээр найдвартай хангах нөхцөл бүрдэхээр байна.
Мөн хуралдаанаар Монгол Улсын Засгийн газар болон Оросын Холбооны Улс-ын Засгийн газар хооронд байгуулсан агаарын хөлгийн түлш нийлүүлэх тухай хэлэлцээрт өөрчлөлт оруулах протоколын төслийг хэлэлцэн дэмжжээ. Энэ асуудлыг мөн Аюулгүй байдал, гадаад бодлогын байнгын хороонд шилжүүлэхээр болсон байна.
Одоогийн байдлаар Монгол Улс агаарын хөлгийн түлшний хэрэгцээгээ 100 хувь ОХУ-аас импортолж байгаа бөгөөд сүүлийн жилүүдэд хэрэглээ огцом өссөн үзүүлэлттэй байна. Тухайлбал, 2022 онд 38.4 мянган тонн байсан хэрэглээ 2025 онд 84.3 мянган тоннд хүрч, хоёр дахин нэмэгджээ.
Цаашид дэлхийн зах зээл дэх газрын тосны үнийн савлагаа, ОХУ-аас экспортын хязгаарлалт тогтоох, татвар нэмэгдүүлэх зэрэг эрсдэлүүд нэмэгдэж болзошгүй байгаа тул уг хэлэлцээрийн өөрчлөлтийг хийх шаардлагатай гэж үзэж байна.
Сэтгэгдэл бичих