Боловсролын ерөнхий газар-аас 2025–2026 оны хичээлийн жилийн хоёрдугаар улирлын бие даалтын долоо хоногийн товыг бүсчлэн тогтоож, хэрэгжүүлэх төлөвлөгөөг танилцууллаа.
Энэхүү зохицуулалт нь Боловсролын сайдын “Хичээлийн жилийн бүтэц шинэчлэн батлах тухай” А/95 дугаар тушаалын хүрээнд хэрэгжиж буй юм.
Тодруулбал,
- Орон нутагт: 2026 оны гуравдугаар сарын 23–27-ны өдрүүдэд
- Нийслэлд: 2026 оны гуравдугаар сарын 30-наас дөрөвдүгээр сарын 3-ны өдрүүдэд
бие даалтын долоо хоногийг зохион байгуулахаар тогтоожээ.
Энэ удаагийн бие даалтын долоо хоногийн гол зорилго нь суралцагчдад гамшиг, аюул ослоос өөрийгөө болон бусдыг хамгаалах мэдлэг, чадвар олгох, аюулгүй амьдрах дадалд сургахад чиглэж байна.
Хөтөлбөрийн хүрээнд ерөнхий боловсролын сургуулийн сурагчдыг насны онцлогоор нь бага, дунд, ахлах анги гэсэн гурван бүлэгт хуваан, тус бүрт нь тохирсон агуулгаар үйл ажиллагаа зохион байгуулах аж. Мөн суралцагч, эцэг эх, асран хамгаалагч, сургууль гэсэн гурван талын оролцоог хангах байдлаар хэрэгжүүлэхээр төлөвлөжээ.
Бие даалтын долоо хоногийн үйл ажиллагааг дараах сэдвийн дагуу өдөр бүр зохион байгуулна:
- Даваа гариг: Эрсдэлийн талаарх ойлголт
- Мягмар гариг: Цахилгааны аюулгүй байдал
- Лхагва гариг: Галын аюулгүй байдал
- Пүрэв гариг: Газар хөдлөлтийн үеийн аюулгүй байдал
- Баасан гариг: Дүгнэлт хийж, танилцуулга бэлтгэх
Энэхүү ажлыг хэрэгжүүлэх хүрээнд Онцгой байдлын ерөнхий газар-тай хамтран “Аюулгүй амьдрах ухаан” хөтөлбөрийн хэрэгжилтийг дэмжих чиглэлээр зохион байгуулах юм.
Сэтгэгдэл бичих