АНУ-ын Виржиниа мужийн Норфолк хотод байрлах Old Dominion University их сургуулийн кампуст буутай этгээд гал нээсэн хэрэг 2026 оны гуравдугаар сарын 12-нд гарч, нэг хүн амиа алдаж, хоёр хүн шархадсан талаар албаныхан мэдээлжээ.
Уг хэрэг их сургуулийн нэгэн барилгын дотор болсон бөгөөд буутай этгээд гэнэт гал нээсэн байна. Халдлагын үеэр кампусын аюулгүй байдлын алба болон оюутнууд шуурхай арга хэмжээ авч, нөхцөл байдлыг хяналтад авчээ.
Эх сурвалжуудын мэдээлснээр, буутай этгээдийг их сургуулийн ROTC буюу цэргийн бэлтгэл сургалтын хөтөлбөрт хамрагддаг оюутнууд дарж зогсоосон бөгөөд халдагч газар дээрээ нас барсан байна.
Халдлагын улмаас нэг хүн амь насаа алдаж, хоёр хүн хүнд гэмтэн эмнэлэгт хүргэгдсэн байна. Шархадсан хүмүүсийг Норфолк хотын эмнэлэгт хүргэн эмчилж байгаа бөгөөд тэдний биеийн байдалд эмч нар хяналт тавьж байгаа аж.
Уг хэрэгтэй холбогдуулан АНУ-ын Federal Bureau of Investigation буюу Холбооны мөрдөх товчоо болон орон нутгийн цагдаагийн байгууллага хамтран мөрдөн шалгаж эхэлжээ. Урьдчилсан байдлаар халдлагыг терроризмын шинжтэй байж болзошгүй хэрэг гэж үзэн шалгаж байгаа талаар албаныхан мэдээлсэн байна.
Хэрэг гарсны дараа их сургуулийн кампусыг түр хугацаанд хааж, оюутан, багш ажилтнуудыг аюулгүй бүсэд шилжүүлсэн бөгөөд мөрдөн шалгах ажиллагаа үргэлжилж байгаа аж.
Одоогоор халдлагын шалтгаан, сэдэл болон халдагчийн талаарх дэлгэрэнгүй мэдээллийг эрх баригчид үргэлжлүүлэн тодруулж байна.
Сэтгэгдэл бичих