Нийслэлийн Иргэдийн Төлөөлөгчдийн Хурлын төлөөлөгч З.Төмөртөөмөө өнөөдөр /2026.03.02/ цахим орчинд шууд дамжуулалтаар зохион байгуулагдаж буй сугалааны үйл ажиллагаатай холбоотой асуудлаар Цагдаагийн Ерөнхий газрын Кибер гэмт хэрэгтэй тэмцэх газрын дарга, дэд хурандаа Э.Гансүхэд албан хүсэлт хүргүүлжээ.
Тэрбээр хүсэлтдээ сүүлийн үед сошиал орчинд “Хусаад хож” нэртэй лайв сугалаанууд олноор зохион байгуулагдаж, олон иргэн хохирч болзошгүй нөхцөл байдал үүсээд байгааг онцолсон байна. Иймд энэ төрлийн цахим залилангийн гэмт хэрэгт өртсөн иргэдийн тоо, авч хэрэгжүүлж буй арга хэмжээ болон цаашид хэрэгжүүлэх бодлого, төлөвлөгөөний талаар албан ёсны мэдээлэл ирүүлэхийг хүсжээ.
Мөн иргэдийг цахим залилангаас урьдчилан сэргийлэх зорилгоор сэрэмжлүүлэг мэдээлэл хүргэх, сургалт зохион байгуулах, олон нийтийн нөлөөллийн арга хэмжээ хэрэгжүүлэх чиглэлээр НИТХ болон цагдаагийн байгууллагын хамтын ажиллагааны боломжийг тодорхойлох шаардлагатай байгааг дурдсан байна.
Түүний үзэж буйгаар энэхүү мэдээлэл нь нийслэл болон дүүргүүдээс сонгогдсон төлөөлөгчдийг бодит мэдээллээр хангахын зэрэгцээ иргэдэд зөвлөгөө, сэрэмжлүүлэг хүргэх, цахим залилангийн гэмт хэргээс урьдчилан сэргийлэхэд чухал ач холбогдолтой аж.
Сүүлийн жилүүдэд цахим орчинд зохион байгуулагддаг сугалаа, хожлын амлалт бүхий лайв дамжуулалтууд нэмэгдэж, иргэд мөнгө шилжүүлсний дараа холбоо тасрах зэрэг залилангийн шинжтэй гомдол цагдаагийн байгууллагад ирэх нь өсөх хандлагатай байгаа юм.
Сэтгэгдэл бичих