Өнгөрсөн баасан гарагт Байгал нуурт үүссэн 3 м өргөнтэй хар хилд хятадын 8 жуулчин тээвэрлэж явсан УАЗ маркийн фургон унаж, живсний улмаас машинд зорчиж байсан 7 жуулчин, жолоочийн хамт амиа алдсан билээ.
Тэгвэл аврагчид нуурын усанд живсэн УАЗ маркийн автомашиныг жолооч болон жуулчдын цогцоснуудын хамт өнгөрсөн бямба гарагт гаргаж авч чаджээ.
Мөрдөн байцаагчдын мэдээлснээр амиа алдсан иргэдийн дунд 44 настай жолооч, БНХАУ-аас 14 настай хүүхэд, хамаатныхаа хүнтэй аялж явсан гэр бүл байжээ.
Оросын Аялал жуулчлалын операторуудын холбооноос мэдээлснээр амиа алдсан жуулчид нь аялал жуулчлалын компаниар дамжуулж бус хувиараа аялж байсан аж.
Эрхүү мужийн захирагч Игорь Кобзев амиа алдсан иргэдийн ар гэр, ойр дотнынхонд гүн эмгэнэл илэрхийлэхийн зэрэгцээ Байгал нуурын мөсөн дээгүүр зорчих нь хориотой гэдгийг анхааруулж, жуулчдад зөвхөн албан ёсны тур операторуудаар дамжуулан аялахыг уриалжээ.
Түүнчлэн уг хэрэг явдал гарснаас хойш өнгөрсөн баасан, бямба гарагт Байгал нуурын усанд автомашин унасан хоёр ч тохиолдол бүртгэгдэж, аврагчид 6 хүнийг аварчээ.
Эх сурвалж: Интерстакс
Сэтгэгдэл бичих