Анжел Монтенегро хулгайлагдсан тэр өдөр бол 2022 оны наймдугаар сарын нэгэн өглөө. 31 настай барилгын ажилчин Монтенегрог өглөө эрт автобус хүлээж зогсоход нь бүхээгтэй цагаан машин руу чирж оруулсан аж. Тэр цагаас хойш гурван жил өнгөрсөн ч Монтенегрогийн сураг гараагүй хэвээр.
Монтенегро бол Мексик даяар сураггүй болсон 130 мянган гаруй хүний нэг. 2000-аад он гарсаар тус улсад хүмүүс сураггүй алга болох нь ихэссэн. Ялангуяа сүүлийн 10 жилийн хугацаанд энэ үзүүлэлт 200 гаруй хувиар өссөн аж.
Аюулгүй байдлын шинжээч Армандо Варгасын хэлснээр энэ асуудал улс үндэстний хэмжээнд хяналтаас гараад байна.
Үүний цаана улс орон даяар улам олширч буй гэмт хэргийн бүлэглэлүүд бий гэж үздэг. Тэдгээр бүлэглэлийн үйл ажиллагаа зөвхөн хар тамхины наймаагаар зогсохгүй өргөн хүрээнд тэлж буй бололтой.
Гэмт хэргийн бүлэглэлүүд эгнээндээ аль болох олон шинэ хүн элсүүлэхийн тулд хүч хэрэглэх нь бий. Гэвч шинэ хүмүүс бусад бүлэглэлүүдийн гарт өртөж, амиа алддаг. Хууль, хүчнийхэнд мэдэгдэхгүйн тулд нас барсан хүмүүсийн цогцсыг шатаах, хүчилтэй саванд уусгах, аль эвсэл янз бүрийн тэмдэглэгээгүйгээр булж оршуулдаг аж.
Үүний зэрэгцээ эд эрхтэн, бэлгийн болон хүний наймаа зэрэг зүйл ч бий.
Мексикийн засгийн газар 2018 онд Үндэсний эрэн хайх комисс гэх албыг байгуулсан. Тус комисс нь алга болсон хүмүүсийг хайж, мөрдөх ажлыг гүйцэтгэдэг. Гэвч санхүүжилт хангалтгүй байснаар тус комисс удалгүй улс төрийн өргөс болж хувирсан юм. 2024 оны сонгуулийн өмнө тухайн үеийн ерөнхийлөгч Андрес Мануэль Лопес Обрадор бүртгэлийн хяналтыг тодорхойгүй болгож, сураггүй алга болсон хүмүүсийн тоог ердөө 12,377 болгон бууруулсан байна. Энэ нь мэдээж хүний эрхийн идэвхтнүүд болон шүүмжлэгчдийн дургүйцлийг өдүүлжээ.
НҮБ-ын мэдээлснээр 2022 онд Мексикт гарсан гэмт хэргийн 96 хувь нь шийдэгдээгүй байна. Улс орон даяар гэмт хэргийн гаралт их ч засгийн газрын хүчин чармайлт сул, чадвар муу байгаа тул сураггүй болсон хүмүүсийн тоо бодит байдал дээр илүү олон ч байж магадгүй юм.
Сэтгэгдэл бичих