Үндэсний их баяр наадмыг зохион байгуулах хорооны ээлжит хуралдаанаар Үндэсний их баяр наадмын найруулагчийн багийг эцэслэн томилох асуудлыг хэлэлцэн шийдвэрлэлээ.
Мөн Үндэсний их баяр наадам болон “Дэлхийн адууны өдөр” арга хэмжээний уялдаа холбоог хангах зорилгоор зарим салбар хороодын чиг үүргийг өргөтгөж, нэмэлт ажил хариуцуулах асуудлыг хэлэлцсэн байна.
Сонгон шалгаруулалтад хамгийн өндөр оноо авсан хоёр оролцогч болох “Скин эвент менежмент” ХХК-ийн найруулагч Б.Анар, “Бүжиг дэглээч Баярбаатар холбоо” НҮТББ-ын найруулагч Д.Баярбаатар нар багийн бүрэлдэхүүн болон ерөнхий төлөвлөгөөгөө танилцуулж, хорооны гишүүдийн асуултад хариулсны дараа нууц санал хураалт явуулжээ.
Хуралдаанд салбар хороодын 19 гишүүн оролцсоноос нийт саналын 84.2 хувийг авч, “Бүжиг дэглээч Баярбаатар холбоо” НҮТББ-ын найруулагч Д.Баярбаатар Үндэсний их баяр наадмын ерөнхий найруулагчаар сонгогдсон байна.
Хурлын төгсгөлд Монгол Улсын Шадар сайд, Үндэсний хорооны дарга Х.Ганхуяг шалгарсан багт төлөвлөгөө, үйл ажиллагаагаа нарийвчлан сайжруулах, салбар хороод төсвийн зардлыг бууруулах боломжийг судлан танилцуулах, мөн “Дэлхийн адууны өдөр” арга хэмжээний зохион байгуулалтын ажлын хэсгийн хурлаар холбогдох асуудлуудыг эцэслэн шийдвэрлэхийг үүрэг болголоо.
Сэтгэгдэл бичих