Валентины баярыг угтсан “Хайрын долоо хоног”-ийн хүрээнд жил бүрийн хоёрдугаар сарын 11-ний өдрийг олон улсад “Hug Day” буюу Тэврэх өдөр болгон тэмдэглэдэг уламжлал тогтжээ. Энэхүү өдөр нь хайртай дотны хүн, гэр бүл, найз нөхдөдөө халуун тэврэлт бэлэглэн сэтгэлийн дэмжлэг, анхаарал халамжаа илэрхийлэхийг уриалдгаараа онцлог юм.
“Hug Day” нь Валентины долоо хоногийн Rose Day, Propose Day, Chocolate Day зэрэг өдрүүдийн дараа тохиодог бөгөөд хосууд төдийгүй найз нөхөд, хамт олон, гэр бүлийн гишүүд хоорондын эерэг харилцааг бэхжүүлэх бэлгэдэл болдог байна. Сэтгэл судлаачдын үзэж буйгаар тэврэлт нь хүний биед “аз жаргалын даавар” хэмээгддэг окситоцины ялгарлыг нэмэгдүүлж, стресс бууруулах, сэтгэл санааг тогтворжуулах эерэг нөлөөтэй аж.
Сүүлийн жилүүдэд энэ өдөр сошиал орчинд өргөн тэмдэглэгдэх болж, хэрэглэгчид хайртай хүмүүстээ зориулсан мэндчилгээ, дурсамжит зураг, богино бичлэг нийтлэх нь түгээмэл болсон. Мөн зарим улс оронд сайн дурын байгууллагууд “Free Hugs” буюу “Үнэгүй тэврэлт” аяныг зохион байгуулж, нийгэмд эерэг уур амьсгал түгээх зорилготой арга хэмжээнүүд өрнүүлдэг байна.
Ийнхүү “Hug Day” нь зөвхөн хосуудын баяр бус, хүмүүсийг харилцан ойлголцол, халуун дулаан харилцаанд уриалсан бэлгэдлийн өдөр болон өргөжиж байгаа нь олон нийтийн анхаарлыг татсаар байна.
Сэтгэгдэл бичих