Яруу найрагч Эмүжин: Нэгнийгээ өмгөөлөн авч үлддэг итгэлийн эд эсийг л хүмүүс хайгаад, нэхээд байгаа юм

 Яруу найрагч Эмүжин олныг цочроосон гэмт хэргийн талаар өөрийн цахим хуудастаа сэтгэгдэлээ илэрхийлэв

Тэрбээр “Охин өнөөдөр 18 нас хүрэх байв. Мэргэжлээ сонгохоор аав ээжтэйгээ зөвлөж, жолооны курст сурах эрх нь үүсч, сурах сургуулиа сонгохоор судалгаа хийж…амьдралын олон олон боломжоос атгахаар завгүй гүйж явах байв. Иргэний эрхдээ бүх утгаар нь эзэн болдог учраас хүүхдүүд 18 насыг тэсч ядан хүлээдэг. Уг хэрэг явдалтай холбоотой хоёр ч бичлэг цацагдлаа, хэчнээн халширмаар байсан ч үнэнийг тэмтрэхийн тулд сонслоо, ойлголт авлаа, бидний нүд чихнээс далд ямар баримт хавтаст хэрэгт байгааг таамаглашгүй ажээ. Алуурчин нь газар дээрээ баригдаж, гэрч хамтрагч, хажууд нь байсан хүмүүс бүгд байсаар атал шийдэгдэлгүй нэг жил долоон сар өнгөрчээ. Энэ сарын 22-нд болох шүүх хурлыг чих тавин хүлээж байна. Үнэн, ёс зүй хоёр хамт ирнэ гэж найдан харж байна даа. Эс үйлдлээрээ алуурчны хамтрагч болсон хоёр хүн, голлон аллага үйлдсэн нэг хүн, бас нэг үл ойлгогдох этгээд…бүгд зохих шийтгэлээ авах ёстой. Улаан галаас хүний амь авардаг сэтгэлийн тасархай, нурж байгаа байшингаас бусдыг нөмрөн халхалдаг хандлагын хэлтэрхий, байгалын хүнд нөхцлөөс хээр осгосон нэгнийгээ өмгөөлөн авч үлддэг итгэлийн эд эсийг л хүмүүс хайгаад, нэхээд байгаа юм. Хэн нэг нь ганц ч гэсэн үйлдэл, агшны ч гэсэн алхам хийсэн бол охин амьд үлдэх боломж байжээ гэдгийг сүүлийн бичлэг илүү нотоллоо. Хүн болгон энэ талаар дуугарах албагүй, эмзэг байна, хүнд байна, сэтгэлзүйн дээврээ бүтэн авч үлдэх гэж хичээж байна, гэвч дуугарахгүй байгаа нь хайхраагүй гэсэн үг биш шүү, нийгмээрээ шүүхийн шийдвэрийг харж, хүлээж, найдаж байна даа. Нийгэм энэ хэргийг тоохгүй байгаа юм шиг, тогтоол ус шиг булингартай бөгөөд хэнэггүй харагдаж байна уу, үгүй дээ, нийтээрээ тогтвортой байх шалтгаан хайж байгаа юм, тэр шалтгаан нь, тайлбар нь маш тодорхой байх учиртай шүүхийн шийдвэр ажээ!