Ж.Д нь өдрийн 15 цагийн үед “Тоёота кроун” маркийн тээврийн хэрэгслийг жолоодон явахдаа эсрэг урсгал сөрсний улмаас “Хино” маркийн тээврийн хэрэгсэл нь урдаа явж байсан “Киа бонго” маркийн тээврийн хэрэгслийн араас мөргөсөн ба“Киа бонго” маркийн тээврийн хэрэгсэл эсрэг урсгалд орж Daewoo маркийн тээврийн хэрэгсэлтэй мөргөлдөж “Киа бонго” тээврийн хэрэгслийн жолооч Л.Г-ийн эрүүл мэндэд хүнд хохирол, зорчигч Э.Э-н эрүүл мэндэд хөнгөн хохирол тус тус учруулсан. Харин Хино маркийн тээврийн хэрэгслийн жолооч М.М нь тээврийн хэрэгслийг жолоодон явахдаа хоорондын зайг хөдөлгөөний хурднаас хамааруулан сонгож яваагүйн улмаас урдаа явж байсан “Киа бонго” маркийн тээврийн хэрэгслийн араас мөргөснөөр дээрх осол гарч Л.Г-ийн эрүүл мэндэд хүнд хохирол, Э.Э-н эрүүл мэндэд хөнгөн хохирол учруулсан хэрэгт тус тус холбогджээ.
Анхан шатны шүүх : Шүүгдэгч М.М, Ж.Д нарыг Эрүүгийн хуулийн тусгай ангийн 27.10 дугаар зүйлийн 2 дахь хэсгийн 2.3-т заасан “Тээврийн хэрэгслийн жолооч хөдөлгөөний аюулгүй байдлын тухай хууль тогтоомж, түүнд нийцүүлэн гаргасан захиргааны хэм хэмжээний актыг зөрчсөний улмаас хүний эрүүл мэндэд хүнд хохирол учруулсан” гэмт хэрэг үйлдсэн гэм буруутайд тус тус тооцож тээврийн хэрэгсэл жолоодох эрхийг 3 жилээр хасаж, 1 жил зорчих эрх хязгаарлах ялаар тус тус оногдуулсныг Давж заалдах шатны шүүх хэвээр үлдээж шийдвэрлэсэн.
Хяналтын шатны шүүх: Тоёота кроун тээврийн хэрэгслийг жолоодон явсан Ж.Д нь Замын хөдөлгөөний дүрмийн 13.1 заасныг зөрчиж үзэгдэх орчин хязгаарлагдмал буюу өгсүүр замд гүйцэж түрүүлэх үйлдэл хийснээр осол гарсан, үүнээс үүдэн М.М нь урдаа явсан Киа бонго тээврийн хэрэгслийг мөргөж дээрх осол гарсан, иймд М.М-г Эрүүгийн хуульд заасан гэмт хэрэг үйлдсэн гэм буруутай гэж үзэх үндэслэлгүй гэх дүгнэлтийг хийж түүнд холбогдох хэргийг хэрэгсэхгүй болгож цагаатгаж, харин шүүгдэгч Ж.Д-д оногдуулсан ялыг хэвээр үлдээж шийдвэрлэлээ.
УЛСЫН ДЭЭД ШҮҮХИЙН ХЯНАЛТЫН ШАТНЫ 2025 ОНЫ 11 ДҮГЭЭР САРЫН 19-НИЙ ӨДРИЙН ЭРҮҮГИЙН ХЭРГИЙН ШҮҮХ ХУРАЛДААН
Сэтгэгдэл бичих