Худалдах-худалдан авах гэрээний гүйцэтгэлийн үнийн зөрүү 558,6 сая төгрөг гаргуулах тухай нэхэмжлэлийн шаардлагаас 42,7 сая төгрөгийг хангаж үлдэх хэсгийг хэрэгсэхгүй болгожээ

“Э” ТӨҮГ 2021 онд тендер зарласан “Г” ХХК тендерт шалгаран 2021 оны 06 дугаар сард гэрээ байгуулсан, тус гэрээгээр бараа нийлүүлэх, тоног төхөөрөмж угсрах, суурилуулах, тохируулга хийх, ажлыг 2021 оны 08 дугаар сарын 07-ны өдөр хүртэл хугацаанд хийж гүйцэтгэх, гэрээний үнэ 4 тэрбум 450 сая төгрөг. Гэрээ байгуулсны дараа ковидын цар тахал гарч хил гааль хаасан нөхцөл байдал бий болж гэрээний үнэд өөрчлөлт орсон тул “Э” ТӨҮГ-т санхүүжилт хүссэн албан бичгүүдийг явуулсан, үүний дагуу “Э” ТӨҮГ ажлын хэсэг байгуулж, үүссэн нөхцөл байдлын талаар хэлэлцэж гэрээний хугацааг сунгасан, үнийн өөрчлөлтийг оруулах боломжгүй харин төсвийн эрх бүхий байгууллагаар магадлал хийлгэсний үндсэн дээр энэ асуудлыг хэлэлцэнэ гэж ээ, “Э” ТӨҮГ-ын ажлын хэсэг шинжээчээр аудитын дүгнэлтэд үнийн өсөлтийг 42,7 сая төгрөгийн өөрчлөлт орсон гэж дүгнэдэг, санхүүжилтийг 42,7 сая төгрөгөөр нэмэхийг “Г” ХХК санал болгоход 42,7 сая төгрөгд үндсэн тоног төхөөрөмжийн үнэ нь ороогүй бусад зардлууд орсон тул зөвшөөрөхгүй гэжээ,
“Г” ХХК гэрээний дагуу үүргээ гүйцэтгэсэн талаар маргахгүй, гэхдээ гэрээний талууд үүссэн нөхцөл байдлын улмаас худалдагчийн гаргасан зардлыг худалдан авагчаас гаргуулна гэсэн нөхцөлийг тохиролцоогүй, гарах эрсдэлийг дан ганц худалдан авагч хариуцах үндэслэл байхгүй гэх тайлбар гарган “Э” ТӨҮГ маргадаг.
Орхон аймаг дахь сум дундын анхан шатны шүүх 2025 оны 02 дугаар сард хэргийг хэлэлцээд: Нэхэмжлэгч нь Ковид цар тахлын улмаас гэрээ байгуулсан нөхцөл байдал өөрчлөгдсөнөөр гэрээний үнэд нөлөөлсөн тул бодит гүйцэтгэлд үндэслэн гэрээний үнийг 558,694,449 төгрөгөөр нэмэгдүүлж шаардсан. Иргэний хуулийн 243 дугаар зүйлийн 243.1 дэх хэсэг болон Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн 40 дүгээр зүйлийн 40.1, 40.1.2, 40.3.8 дахь хэсэгт заасныг баримтлан гэрээнд үнийн тохируулга хийхээр тохиролцоогүй гэж дүгнэж нэхэмжлэлийг бүхэлд нь хэрэгсэхгүй болгожээ.
Орхон аймгийн Иргэний хэргийн давж заалдах шатны шүүх 2025 оны 06 дугаар сард хэргийг хэлэлцээд: Талуудын хооронд байгуулагдсан худалдах-худалдан авах гэрээний үнэ нь гэрээ байгуулагдсаны дараа өөрчлөгдсөн, Ковидын нөхцөл байдал нийтэд илэрхий үйл баримт болох тул цар тахлын улмаас үүссэн нэмэлт зардал бодитоор 379 сая төгрөгийн хэмжээгээр нэмэгдсэн, эрсдэлийг гэрээний нэг талд ногдуулж болохгүй гэх үндэслэлээр талуудад тэнцүү хариуцуулж, Иргэний хуулийн 243 дугаар зүйлийн 243.1, 220 дугаар зүйлийн 220.1 дэх хэсэгт зааснаар хариуцагчаас 189,5 сая төгрөгийг гаргуулж нэхэмжлэгчид олгож, нэхэмжлэлээс үлдэх хэсгийг хэрэгсэхгүй болгож шийдвэрлэжээ.
Хяналтын шатны шүүх: Зохигчид нь гэрээнд үнийн тохируулга хийх талаар тохиролцоогүй тул нэхэмжлэгч холбогдох зардлыг шаардах эрхгүй, энэ талаар хийсэн анхан шатны шүүхийн дүгнэлт зөв. Харин хариуцагч нь хөндлөнгийн аудитын дүгнэлтээр үнийн өсөлтийн зөрүү 42,7 сая төгрөгөөр нэмэгдсэн болохыг зөвшөөрч нэхэмжлэгчид санал болгосон тул энэ дүнгээр нэхэмжлэлийн шаардлыг хангаж, хариуцагчаас 42,7 сая төгрөг гаргуулж, нэхэмжлэгчид олгож, хариуцагчийн итгэмжлэгдсэн төлөөлөгч нарын гаргасан хяналтын гомдлын зарим хэсгийг хангаж шийдвэрлэлээ.
УЛСЫН ДЭЭД ШҮҮХИЙН ХЯНАЛТЫН ШАТНЫ 2025 ОНЫ 10 ДУГААР САРЫН 30-НЫ ӨДРИЙН ИРГЭНИЙ ХЭРГИЙН ШҮҮХ ХУРАЛДААН