Ц.Тэмүүлэн нь тээврийн хэрэгсэл жолоодох эрхээ хасуулсан буюу тээврийн хэрэгсэл жолоодох эрхгүй үедээ “Тоёота Харьер” маркийн тээврийн хэрэгслийг жолоодож явахдаа Монгол Улсын Замын хөдөлгөөний дүрмийн 13.1 “Жолооч гүйцэж түрүүлэхийн өмнө хөдөлгөөний эрчим, хурд хөдөлгөөний дагуу үзэгдэлтийг харгалзан, уг үйлдлийг гүйцэтгэхэд аюул үүсгэхгүй, бусдын хөдөлгөөнд саад учруулахгүй байх, мөн хүрэлцэхүйц хэмжээний зай байгаа эсэхийг анхаарч мэдсэн байвал зохино”, 13.2-н “д” буюу “гүйцэгдсэн тээврийн хэрэгслийн хөдөлгөөнд аюул, саад учруулахгүйгээр буцаж эгнээндээ орох боломжгүй тохиолдолд гүйцэж түрүүлэхийг хориглоно” гэснийг тус тус зөрчсөний улмаас 2022 оны 6 дугаар сард Төв аймгийн нутаг дэвсгэрт хатуу хучилттай асфальтан замд зам тээврийн осол гарч “Тоёота Ланд 200” маркийн тээврийн хэрэгсэл, “Хьюндай Портер” маркийн тээврийн хэрэгсэл, “Тоёота Харьер” маркийн тээврийн хэрэгсэл, “Тоёота приус 20” маркийн тээврийн хэрэгсэл, “Истана” маркийн тээврийн хэрэгслүүд хоорондоо мөргөлдөж, “Хьюндай Портер” маркийн тээврийн хэрэгслийн зорчигч Б-н эрүүл мэндэд хүндэвтэр хохирол учруулсан гэмт хэрэгт холбогджээ.
Анхан шатны шүүх: Шүүгдэгч Ц.Тэмүүлэн нь Эрүүгийн хуулийн тусгай ангийн 27.10 дугаар зүйлийн 2.2-т зааснаар “авто тээврийн хэрэгслийн хөдөлгөөний аюулгүй байдал, ашиглалтын журам зөрчих” гэмт хэргийг “тээврийн хэрэгсэл жолоодох эрхгүй хүн” хүний эрүүл мэндэд хүндэвтэр хохирол учруулсан гэм буруутайд тооцож. Иргэний нэхэмжлэгч Б-д 5 сая, Т-д 1,1 сая, Б-д 4 сая төгрөгийг тус тус шүүгдэгчээс гаргуулан олгох, иргэний хариуцагч Д-н 12 сая төгрөгийн нэхэмжлэлийг хэрэгсэхгүй болгож, Эрүүгийн хуулийн тусгай ангийн 27.10 дугаар зүйлийн 2.2-т зааснаар тээврийн хэрэгсэл жолоодох эрхийг 1 жилийн хугацаагаар хасаж, 1 жилийн хугацаагаар Хан-Уул, Баянзүрх, Сүхбаатар дүүргээс гарахыг хориглож зорчих эрх хязгаарлах ял оногдуулж шийдвэрлэсэн.
Төв аймгийн Эрүү, Иргэний хэргийн давж заалдах шатны шүүх хэргийг хэлэлцээд шүүгдэгч Ц.Тэмүүлэнд холбогдох хэргийг гэмт хэргийн шинжгүй үндэслэлээр Эрүүгийн хэрэг хянан шийдвэрлэх тухай хуулийн 34.19 дүгээр зүйлийн 1 дэх хэсгийн 1.1-д зааснаар хэргийг хэрэгсэхгүй болгож цагаатгаж шийдвэрлэжээ.
Хяналтын шатны шүүх: Шүүгдэгч нь гүйцэж түрүүлэх үйлдэл хийхдээ Замын хөдөлгөөний дүрэм баримтлаагүйн улмаас осол гарах гол нөхцөлийг бүрдүүлсэн. Анхан шатны шүүх хязгаарлалтын бүсийг 3 дүүргээр тогтоосон нь үндэслэлгүй, шүүгдэгчийн ажиллаж, амьдарч байгаа нутаг дэвсгэрээр өөрчлөн тогтоох нь зүйтэй, мөн ослын улмаас эд хөрөнгөдөө учирсан хохирлыг Д-н Иргэний хэрэг шүүхэд хянан шийдвэрлэх журмаар жич нэхэмжлэх эрх нь нээлтэй гэсэн дүгнэлтийг хийж магадлалыг хүчингүй болгож, шийтгэх тогтоолд өөрчлөлт оруулж шийдвэрлэлээ.
УЛСЫН ДЭЭД ШҮҮХИЙН ХЯНАЛТЫН ШАТНЫ 2025 ОНЫ 10 ДУГААР САРЫН 15-НЫ ӨДРИЙН ЭРҮҮГИЙН ХЭРГИЙН ШҮҮХ ХУРАЛДААН
Сэтгэгдэл бичих