С.Саранзаяа нь ажил олгогч Алтанжолоо импекс ХХК-н захирлын 2024 оны 02 дугаар сарын 14-ны өдрийн ажлаас чөлөөлсөн тушаал нь хууль бус гэж марган ажилд эргүүлэн тогтоолгох, ажилгүй байсан хугацааны цалин олговор гаргуулах, мөн ажилгүй байсан хугацааны нийгмийн болон эрүүл мэндийн даатгалын шимтгэлийг нөхөн төлүүлэх тухай нэхэмжлэлийн шаардлага гаргасныг ажил олгогч Алтанжолоо импекс ХХК эс зөвшөөрч гаргасан тайлбартаа нэхэмжлэгч С.Саранзаяа нь хөдөлмөрийн дотоод журам болон хөдөлмөрийн гэрээнд заасан зөрчил, зан харилцаа ёс зүйн доголдол гаргасан, хамт ажиллагсадтайгаа таарамжгүй харьцдаг дарамталдаг ёс зүйн доголдол гаргадаг талаар гомдол ирсэн, өөрт нь эхлээд урьдчилж сануулсан гэтэл энэ хугацаанд дахиад зөрчил гасан учир хөдөлмөрийн гэрээг цуцалсан гэх тайлбар гарган маргажээ.
Баянгол, Хан-Уул, Сонгинохайрхан дүүргийн Иргэний хэргийн анхан шатны тойргийн шүүх 2025 оны 04 дүгээр сарын 10-ны өдөр хэргийг хэлэлцээд нэхэмжлэлийн шаардлагыг хангаж шийдвэрлэсэн, Нийслэлийн Иргэний хэргийн давж заалдах шатны шүүхийн 2025 оны 05 дугаар сарын 30-ны өдөр хэргийг хэлэлцээд шийдвэрийг хэвээр үлдээсэн, ингэхдээ хоёр шатны шүүх нэхэмжлэгчтэй байгуулсан хөдөлмөрийн гэрээг цуцалсан ажил олгогчийн тушаал нь Хөдөлмөрийн тухай хуулийн 80 дугаар зүйлийн 80.1.2-т заасныг үндэслэсэн энэ тохиолдолд ажилтан мэргэжил, мэргэшлийн түвшин ур чадвар тэнцэхгүй байгаа талаар ажилтанд анхааруулах, боломжит хугацаа олгох ёстой байсан, ур чадвар нь дутсан гэдэг үйл баримт хэрэгт цугларсан нотлох баримтаар тогтоогдоогүй мөн ажил олгогч нь ажилтнуудаас гомдол ирсэн талаар гэрч асуулгасан, өргөдөл ирсэн гэх баримтыг үндэслэж маргаж байгаа боловч зөрчил шалган шийдвэрлэх ажиллагааг хуулийн дагуу явуулаагүй, ажилтанд өөрт нь мэдэгдэх, тайлбар авах, шалгах ажиллагааг явуулаагүй байгаа нь хуульд заасан үндэслэлд нийцэхгүй байна гэж дүгнэн нэхэмжлэлийн шаардлагыг бүхэлд нь хангаж шийдвэрлэжээ.
Хяналтын шатны шүүх: Анхан болон давж заалдах шатны шүүх нэхэмжлэгчийг ажилд нь эргүүлэн тогтоож ажилгүй байсан хугацааны олговорт 41,1 сая төгрөгийг ажил олгогчоос гаргуулж нэхэмжлэгчид олгохоор шийдвэрлэсэн. Нэхэмжлэгч талаас хяналтын шатны шүүхэд гомдол гаргахдаа хоёр шатны шүүх Дундаж цалин хөлс тодорхойлох журмыг буруу хэрэглэсэн гэх үндэслэлээр гаргасныг хяналтын шатны шүүх Иргэний хэрэг шүүхэд хянан шийдвэрлэх тухай хуулийн 172 дугаар зүйлийн 172.2.1-т заасан үндэслэлээр хэргийг хэлэлцээд гомдлыг хангах нь үндэслэлтэй гэж үзэж шийдвэр магадлалд өөрчлөлт оруулна, ингэхдээ хариуцагч Алтанжолоо импекс ХХК-с ажилгүй байсан хугацааны олговорт 41,1 сая төгрөг гаргуулах гэснийг 42,5 сая болгон өөрчилж шийдвэрлэлээ.
УЛСЫН ДЭЭД ШҮҮХИЙН ХЯНАЛТЫН ШАТНЫ 2025 ОНЫ 10 ДУГААР САРЫН 07-НЫ ӨДРИЙН ИРГЭНИЙ ХЭРГИЙН ШҮҮХ ХУРАЛДААН
Сэтгэгдэл бичих