Монгол Улсын Ерөнхийлөгч Ухнаагийн Хүрэлсүхэд Исламын Бүгд Найрамдах Иран Улсаас Монгол Улсад хавсран суух Онц бөгөөд Бүрэн эрхт Элчин сайд Абдолреза Рахмани Фазли Итгэмжлэх жуух бичгээ өргөн барив.
Монгол Улсын Ерөнхийлөгч Ухнаагийн Хүрэлсүх Элчин сайд Абдолреза Рахмани Фазлийг Итгэмжлэх жуух бичгээ өргөн барьж, үүрэгт ажилдаа орж байгаад баяр хүргэж, ажлын амжилт хүслээ.
Хоёр улсын хооронд дипломат харилцаа тогтоосны 55 жилийн ой ирэх онд тохиож буйг дурдаж, харилцаа, хамтын ажиллагааг худалдаа, эдийн засаг, хөдөө аж ахуй, аялал жуулчлал, соёл, хүмүүнлэг зэрэг бүхий л салбарт өргөжүүлэн хөгжүүлэх боломжтойг тэмдэглэлээ.
Түүхт ойн хүрээнд соёлын дурсгалт өвийг хамгаалах, нөхөн сэргээх, музей хооронд хамтын ажиллагаа тогтоох, хамтарсан үзэсгэлэн гаргах зэрэгт Элчин сайдыг хүч чармайлт гарган ажиллана гэдэгт итгэлтэй буйгаа илэрхийлэв.
Элчин сайд Абдолреза Рахмани Фазли, Монгол Улсад хавсран суух Элчин сайдаар томилогдсон нь нэр төрийн хэрэг гэдгийг тэмдэглэж, харилцан ашигтай хамтын ажиллагааг бүхий л салбарт өргөжүүлэн хөгжүүлэхийн төлөө идэвхтэй ажиллахаа илэрхийллээ.
Сэтгэгдэл бичих