2025 оны 9-р сарын 10. Дэлхийн зах зээл дээр алтны үнэ өнөөдөр дахин өсөж, түүхэн дээд түвшинд хүрлээ. Spot зах зээл дээр нэг унц алт 3,640–3,670 ам.доллар-ын хооронд арилжигдаж байгаа бол арилжааны фьючерс (12-р сарын гэрээ) ойролцоогоор 3,650 ам.доллар байна.
Шинжээчдийн үзэж буйгаар АНУ-ын Холбооны нөөцийн банк (Fed) хүүний бууруулалт хийх төлөвтэй байгаа нь хөрөнгө оруулагчдыг аюулгүй хөрөнгө болох алт руу чиглүүлж байна. Үүнтэй зэрэгцэн дэлхийн голлох төв банкууд, ялангуяа БНХАУ-ын Төв банк тасралтгүй алт худалдан авч буй нь зах зээл дээрх эрэлтийг эрс нэмэгдүүлжээ.
Эдийн засгийн шинжээчдийн тооцоогоор энэ оны сүүлч гэхэд алтны үнэ 3,800 ам.долларт хүрэх боломжтой бол 2026 оны эхээр 4,000 ам.долларт хүрч магадгүй гэж үзэж байна. Харин Goldman Sachs-ийн сэрэмжлүүлснээр, хэрэв Fed-ийн бие даасан байдал алдагдвал алтны үнэ нэг унц нь 5,000 ам.доллар давж өсөх эрсдэлтэй байна.
Эдийн засгийн энэ нөхцөл байдал нь Монголын алт олборлогч болон экспортлогч компаниудын орлого нэмэгдэх боломжийг бүрдүүлэхийн зэрэгцээ төгрөгийн ханш, валютын зах зээлд тодорхой нөлөө үзүүлэхээр байна.
Сэтгэгдэл бичих