НҮҮРСНИЙ БОРЛУУЛАЛТ 7 САРД 2.6 САЯ ТОНН БОЛЖ ӨСЛӨӨ

‘Эрдэнэс Тавантолгой’ ХК “Уул уурхайн бүтээгдэхүүний биржийн’ тухай хуулийн дагуу нүүрсний борлуулалтыг Монголын хөрөнгийн биржээр дамжуулан нээлттэй, ил тод, өрсөлдөөний зарчмаар цахимаар явуулж байна.

2025 оны эхний хагас жилд нүүрсний зах зээлийн нөхцөл байдалтай холбоотойгоор борлуулалт буурч, эхний 6 сарын байдлаар 10.2 сая тн нүүрс борлуулсан.Зах зээлийн нөхцөл байдалтай уялдуулан худалдааны болон тээврийн оновчтой бодлогыг ‘Эрдэнэс Тавантолгой’ ХК-ийн зүгээс хэрэгжүүлснээр 2025 оны 7 сард 2.6 сая тн нүүрс борлуулсан. Энэ нь оны хамгийн өндөр үзүүлэлттэй сар байсан бөгөөд мөн 1.0 сая тн нүүрсийг Хөрөнгийн биржээр арилжаалав.

Уул уурхайн бүтээгдэхүүний биржийн тухай хуулийн дагуу ‘Эрдэнэс Тавантолгой’ ХК-ийн борлуулалтын үйл ажиллагаа нь зөвхөн биржээр хийгддэг болсон бөгөөд 7 сард хийгдсэн 1.0 сая тн нүүрсний биржийн арилжааны 25 хувийг коксжих, 45 хувийг эрчим хүчний нүүрс, 25 хувийг 1/3 коксжих нүүрс, 5 хувийг баяжуулсан нүүрс тус тус эзэлж байна. 7 сард нүүрсний 19 цахим арилжаа зарласны 84 хувийн борлуулалт амжилттай боллоо.

Засгийн газраас томилогдсон Бүрэн эрхт төлөөлөгчийн багийн зүгээс уул уурхайн биржийн тухай хуулийн дагуу борлуулалтын үйл ажиллагааг нээлттэй, ил тод, цахим байдлаар Хөрөнгийн биржээр дамжуулан хийж байгаа бөгөөд тээвэрлэлтийн үе шатыг оновчлон худалдан авагчдад бүтээгдэхүүнийг богино хугацаанд хүргэх боломжит бүхий л арга хэмжээг авч хэрэгжүүлэн ажиллаж байна.