Монгол Улсын Засгийн газар болон Саудын Арабын Хаант Улсын Засгийн газар хооронд Агаарын харилцааны хэлэлцээрт өнөөдөр (2025.07.16) гарын үсэг зурлаа. Энэхүү хэлэлцээр нь хоёр улсын хооронд тогтмол нислэг үйлдэх, агаарын тээврийн салбар дахь хамтын ажиллагааг бэхжүүлэх эрх зүйн үндсийг бүрдүүлж байгаа юм.
Монгол Улсын Засгийн газрыг төлөөлж Зам, тээврийн сайд Б.Дэлгэрсайхан, Саудын Арабын Хаант Улсын Засгийн газрыг төлөөлж тус улсын Иргэний нисэхийн ерөнхий газрын дарга Абдулазиз бин Абдулла Аль-Дуэйлэж нар хэлэлцээрт гарын үсэг зурав.
Саудын Арабын талаас тус улсын Иргэний нисэхийн удирдах газрын төлөөлөгчид 2025 оны 07 дугаар сарын 15-17-ны өдрүүдэд Монгол Улсад айлчилж, Зам, тээврийн яаманд хэлэлцээрийг байгуулав.
Хэлэлцээрийн хүрээнд хоёр улс агаарын тээвэрлэгчээ харилцан томилох, тогтмол болон захиалгат нислэгийг тохиролцсон чиглэлээр үйлдэх, нислэгийн хуваарь, үнэ тарифыг зах зээлийн зарчмаар тогтоох, зах зээлд тэгш хүртээмжтэй өрсөлдөөнийг хангах, аюулгүй байдал болон нисэхийн аюулгүй ажиллагаанд хамаарах олон улсын стандартыг мөрдөх зэрэг зарчмуудыг тусгасан байна.
Мөн хэлэлцээрээр зорчигч, ачаа, шуудан тээвэрлэлтийн үйлчилгээнд гааль, татвар, валютын хяналтын талаар тэгш эрхтэйгээр хоёр улсын агаарын тээвэрлэгчид харилцан ашигтай хамтын ажиллагаа эхлүүлэх боломжийг нээж өгч буйгаараа ач холбогдолтой юм.
Энэхүү хэлэлцээр нь Монгол Улсын агаарын тээврийн сүлжээг өргөжүүлэх, гуравдагч улс руу чиглэсэн транзит болон лалын шашинтны Хаж мөргөл зэрэг тусгай нислэгийг зохион байгуулах, агаарын тээвэрлэгчдийн хувьд шинэ зах зээлд нэвтрэх боломжийг бүрдүүлж байгаа чухал алхам боллоо.
Талууд цаашид агаарын тээврийн салбарт хамтын ажиллагаагаа өргөжүүлэн, зорчигч урсгалыг нэмэгдүүлэх, хоёр улсын хооронд худалдаа-эдийн засгийн харилцааг нэмэгдүүлэх, аялал жуулчлалыг хөгжүүлэх чиглэлээр хамтран ажиллахаар тохиролцов.
Сэтгэгдэл бичих