Ойрын өдрүүдэд жагсаал цуглаан идэвхжих төлөвтэй. Жилийн энэ үед санаатай санаандгүй жагсагчид олширдог. Хамгийн гол нь гаднаас ажиллах хүч авахтай холбоотой Пүрэвжавын Сайнзориг нарын гишүүдийн өргөн барьсан хуулийн төсөл олны анхаарал татав бололтой. Иргэдийн айдас хүйдэс дээр дөрөөлөн цөөн хэдэн хүмүүс эрх ашиг аа гүйцэлдүүлдэг хачин нийгэмд бид амьдарч байна. Уинстон Черчилль хэлэхдээ “Ардчилал бол хамгийн муу засаглал. Бусдыг нь тооцохгүй бол шүү дээ” гэсэн гэдэг. Үнэн болж таарав.
Төрийн ордны баруун халуун хаалган дээр гуч хүрэхгүй хүн цугласан байв. Бямбасүрэнгийн Жагар мэтийн жагсагчид тэдний дунд үзэгдэв. Тэдгээр хүмүүст жагсаал гэх үг дэндүү томдох мэт санагдсаныг нуух юун. Үгүйдээ цуглаан гэж нэрлэж яагаад болохгүй гэж. Юм үнэнээрээ сайхан. Амьдрал энгийн тусмаа жаргалтай гэдэг биз. Дээр дооргүй хэлбэр хөөх үзэгдэл түгээмэл болсныг дээрх үзэгдлээс бас харж болно. Нэр төдий эх орончид ард түмнийг эрлийзжүүлэх, хужаажуулах эхний давлагаа эхлэлээ гэх мэтээр хүчтэй цуурч байна. Монголчууд хэрсүү болсон, тархи угаах технологид амархан автахгүй болов уу.
Хамгийн чухал нь Монголын хөгжил байлаа. Засгийн газар 14 мега төсөл төсөл хэрэгжүүлнэ гэсэн. Үнэн хэрэгтэй эдгээр төслүүдэд шаардлагатай ажиллах хүчийг бид дотоодоос хангах боломжгүй. Яг үнэндээ бид чадна гэж буй хүмүүс асуудал өөр дээр ирвэл ул мөргүй алга болдог. Гаднаас ажиллах хүчийг нэр бүхий салбарт квотгүй оруулж ирэх нь өнөөдрийн хувьд бидэнд ашигтай. Харин Монголын хөгжлийг гацаагчдад ашиггүй байх нь гарцаагүй.
Жишээлбэл, Дубай хотоороо алдартай Арабын нэгдсэн Эмират улсын үндсэн иргэд нь маш бага. Гэтэл 10 сая Энэтхэг, Вьетнам, Филиппин тэргүүтэй улс орны иргэд тэдний хар бор ажлыг хийж байна. Тэглээ гээд Дубай хотын иргэд биднийг Энэтхэгжүүллээ гэхгүй л байна. Бид яагаад бусад орны иргэдийг ийм маягаар ажиллуулж болохгүй гэж.
Тэмцэл хийж буй зарим иргэд Хятад, Вьетнамын дайны тухай сөхөж байна лээ. Эхлээд иргэдээ ажиллах хүч гэсэн нэрийдлээр оруулж ирээд дараа нь хамгаалж буй нэрийдлээр цэрэг оруулдаг гэж донгосож байна. Яг үнэндээ тэр дайн геополитикийн шал өөр асуудал. Судалгаа байхгүй муйхраар ярих нь ийм л осолтой. Ажиллах хүч авбал заавал Хятад улсын иргэдийг авна гэж бас хэн хэлэв. Дээр дурдсан Вьетнам, Филиппин гэх мэт орнуудаас ажиллах хүч хангалтай татаж болно.
Гадаадын иргэний эрх зүйн байдлын тухай хуулийн 27.4 Монгол улсын нутаг дэвсгэрт хувийн хэргээр оршин суугч гадаадын иргэдийн тоо нь Монгол улсын харьяат хүн амын гурван хувь, үүний дотор нэг улсын иргэн нэг хувь хүртэл байж болно гэж заасан байдаг. Хувийн хэргээр оршин суугч гадаадын иргэн гэдэг манай улсад хөдөлмөр эрхэлж буй гадаад улсын хүн хамаардаг бөгөөд тэдгээрт тавьдаг тоо хязгаар, квот хэвээрээ байгаа юм. Энэ хязгаар, квотоо мөрдөхөд болно.
Мөн Гэр бүл, хөдөлмөр нийгмийн хамгааллын сайд Л.Энх-Амгалан мэдээлэл хийсэн. Энэ үеэрээ “Миний бие ажиллах хүчний шилжилт хөдөлгөөний тухай хуульд нэмэлт өөрчлөлт оруулах тухай хуулийн төслийг 2024.12.20-ны өдөр УИХ-ын даргад өргөн мэдүүлсэн. Хуулийн үзэл баримтлалыг бүрэн ойлгохгүйгээр, иргэдэд буруу мэдээлэл түгээж, зорилттойгоор талцуулан, турхирч байгаад харамсаж байна. Тус хуульд Монгол Улсад хөдөлмөр эрхлэх гадаад ажилчдыг квотгүйгээр оруулж ирэх, 288 мянган хятад иргэд оруулж ирэх тухай нэг ч заалт байхгүйг хариуцлагатайгаар мэдэгдье. Энэ бол ганцхан Л.Энх-Амгалангийн хууль биш. Хамтарсан Засгийн газрын бүх гишүүн дэмжиж, УИХ-д өргөн барьсан хуулийн төсөл юм гэлээ.
Тэхээр иргэд бидний судалгаа дутмаг байна. Нөгөө талдаа төр засаг иргэддээ үнэн зөв мэдээлэл түгээхэд анхаарах хэрэгтэй. Буруу ташаа мэдээллээс үүдсэн хор уршгийг дараа нь нөхөх боломжгүй.
Чанцалын Бэлгүүтээ
Сэтгэгдэл бичих