Авлигатай тэмцэх газраас өнөөдөр /2018.12.25/ цаг үеийн асуудлаар мэдээлэл хийсэн билээ. Энэ үеэр тус газрын Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатар “Улс төрийн албан тушаалыг 60 тэрбум төгрөгөөр арилжсан гэх асуудал хоёр жилийн хугацаанд яригдаж байна. Энэ хэрэгт 2017 оны долдугаар сард эрүүгийн хэрэг үүсгэж, ЦЕГ болон ТЕГ, АТГ хамтарсан ажлын хэсэг мөрдөн шалгах ажиллагааг явуулсан. Мөрдөн байцаалтын явцад тухайн яриа болсон гэдгийг тогтоосон. Харин хэрэгжсэн эсэх нь асуудал дагуулаад байгаа юм. Одоо өмнө нь ажиллаж байсан хүмүүс мөрдөн шалгах ажиллагаагаа явуулж байгаа” гэх тайлбарыг өглөө.
Хуулийнхан ”Алтан Дорнод Монгол”-ын Т.Ганболдоос тайлбар аваагүй гэв
“Алтан Дорнод Монгол” компанийн захирал Т.Ганболд хэвлэлд өгсөн ярилцлагадаа Хууль зүйн сайд асан Д.Дорлигжавын төрсөн дүүгийн данс руу дөрвөн сая ам.доллар шилжүүлсэн талаараа ам алдсан билээ. Харин энэхүү мэдээллийн мөрөөр АТГ-аас Хууль зүйн сайд асан Д.Дорлигжавыг шалгаж эхлээд байгаа юм. АТГ-ын Мөрдөн шалгах хэлтсийн ахлах мөрдөгч, ахлах комиссар Ч.Жаргалбаатараас энэ талаар тодруулахад, “Д.Дорлигжавын хэрэгт мөрдөн шалгах ажиллагаа явуулж байгаа. Мэдээлэл түгээсэн хүн нь гадаад руу гарч явсан байгаа учраас тайлбар авч чадаагүй байна” гэх тайлбарыг өглөө. Өөрөөр хэлбэл, хуулийнхан “Алтан Дорнод Монгол” компанийн захирал Т.Ганболдоос албан ёсны тайлбар авахаар хүлээж байгаа аж.
АТГ-аас Хотын дарга асан С.Батболдыг шалгаж байна
Зарим хэвлэлээр Хотын дарга асан С.Батболдыг хууль бусаар газар олгосон гэх мэдээлэл түгээд байгаа билээ. Энэ талаар АТГ-аас тодруулахад “Нийслэлийн Засаг даргаар ажиллаж байсан С.Батболдтой холбоотой асуудлыг шалгаж байгаа. Гэхдээ дэлгэрэнгүй мэдээлэл өгөх боломжгүй” гэх тайлбар өгсөн юм.
Сэтгэгдэл бичих