Нийслэлийн
аялал жуулчлалын газар (НАЖГ)-ын дэд дарга Ц.Энхтүвшин өнгөрсөн
амралтын өдрүүдэд фэйсбүүк хуудаснаа шинэ жилийн баярын үдэшлэг дээр
дээлтэй эрийг “нүд үзүүрлэсэн” тухайгаа нийтэлж орхисон нь сошиал орчинд
ихээхэн шүүмжлүүлээд дагуулав.
Тэрбээр
“Ёолкны хувцаслалт бол гоёлын болон албаны. Нэг байгууллагын ах дээлтэй
бүжээд байхаар нь “Та бүжиглэхгүй зүгээр сууж байхгүй юу” гэж зөвлөсөн
биш хүүхнүүдэд нь барьж идүүлэх шахлаа. Ширээндээ л сууж байна биз.
Соёлжих нийгэмшихэд дахиад хэдэн арван жил хэрэгтэй бололтой. Явцыг
хурдлуулах нь бидний үүрэг. 450 зочдоо хүндэтгээд протоколын ёс
зөрчихгүй байвал. Зарим аж ахуй нэгжүүд салбарынхнаа нэгдлийг өөрсдийн
ганц нэг оролцогчоос дээгүүр тавихгүй байхыг хойшид анхаарна биз дээ.
Дөчин мянгатын бид соёлыг түгээхэд түүчээлэх үүрэгтэй. Зарим нэг нь
хараана биз. Зарчим бол зарчим. Ёолкондоо бэлдэж гоёж ирсэн олон зуун
бүсгүйчүүдийн хөдөлмөрийг жаахан ч гэсэн үнэлэх ёстой болов уу. Бусдаар
бол гоё шүү” гэж хувийн фэйсбүүк хуудсандаа бичсэн бөгөөд олон хүн ингэж
бичсэнийг нь шүүмжилж, түүнд таагүй хандлага илэрхийлжээ.
“НАЖГ-ын
дэд даргаар ажилладаг хүн дээлтэй монгол хүнээ нүд үзүүрлэдэг нь
үнэхээр зохисгүй байна”, “Аялал жуулчлалыг татах нэг хэрэгсэл нь монгол
дээл шүү дээ” гэх зэргээр олон нийт цахим орчинд үзэл бодлоо
уралдуулжээ.
Олны хэл аманд өртсөн дэд дарга удалгүй дээрх постоо устгасан бөгөөд Өмнөговь аймгийн Баяндалай сумын Төхөм багаас ирж, шинэ жилийн баярын арга хэмжээнд оролцсон тэмээчин Б.Буяндэлгэр гуайгаас уучлал гуйхаа мэдэгдсэн байна. Ц.Энхтүвшин “Дээлтэй ахаас уучлалт гуйж байгааг хүлээн авна уу. Ёолкноос хөөгөөгүй ээ, ах аа. Дээлтэй бүжиглэх нь зохисгүй байна гэсэн. Дээлтэй ахын утсыг нь мэдэх хүн чатаар явуулна уу. Нутаг өөдөө яваагүй байвал уулзаад, уучлалт гуйна” хэмээн бичиж үлдээжээ.
Эх сурвалж: ZINDAA.MN
Сэтгэгдэл бичих