Коронавируст цар тахлаас үүдэлтэй хязгаарлалт, хорио цээр БНАСАУ-ын эдийн засагт үлэмж хэмжээний хохирол учруулж нөхцөл байдал Солонгосын дайны үеийнх шиг амаргүй байгаа талаар Ким Жон Ун мэдэгджээ. Солонгосын мэдээний төв агентлагийн дамжуулснаар Умардын удирдагч өнөөдөр ахмад дайчдын үндэсний чуулган дээр үг хэлэхдээ ийнхүү өгүүлжээ. Уг чуулганыг Солонгосын дайн дуусаж, энхийн хэлэлцээр байгуулагдсаны 68 жилийн ойгоор зохион байгуулсан юм.
Тэрбээр “Өнөөдөр бид дэлхий дахинд урьд өмнө тохиолдож байгаагүй эрүүл мэндийн хямралаас үүдэлтэй хүнд хэцүү бэрхшээлтэй нүүр тулж байна. Үргэлжилсэн урт хугацааны тусгаарлалт нь дайны үеийнхээс илүү бэрхшээлтэй байна” гэжээ. Ким Жон Ун цааш нь ард иргэдээ дайнд ялсан өвөг дээдсийнхээ уламжлалыг үргэлжлүүлж, улс орноо хөгжил цэцэглэлтэд хөтлөхийг уриаллаа.
Солонгосын дайн дууссаны ой бол БНАСАУ-ын үндэсний баярт тооцогддог. Солонгосын хойг дахь тулаан 1950 оны зургаадугаар сарын 25-нд эхэлж 1953 оны долоодугаар сарын 27-нд дууссан юм. Хойд ба Өмнөд Солонгосын хоорондох цэрэггүй бүс Панмунжом тосгонд эвлэрлийн гэрээнд гарын үсэг зурснаар байлдаан өндөрлөж байв. Гэхдээ бүрэн хэмжээний энх тайвны гэрээг өнөөг хүртэл байгуулаагүй тул дайн албан ёсоор өндөрлөөгүй гэж үздэг юм.
Цар тахал эхэлснээс хойш тус улсад коронавируст халдварын нэг ч тохиолдол бүртгэгдээгүй гэж Умард Солонгосын эрх баригчид мэдэгдэж буй. Тус улс халдварын эсрэг хатуу чанд арга хэмжээ авч, хилээ бүрэн хаагаад байгаа юм.
Сэтгэгдэл бичих