Монгол Улсын Ерөнхий сайд Л.Оюун-Эрдэнэ Япон Улсад ажлын айлчлал хийх үеэр Япон Улсын Ерөнхий сайд Ё.Сүгатай албан ёсны уулзалт хийсэн юм.
Энэ үеэр Ерөнхий сайд Ё.Сүга Олимпийн наадмыг зохион байгуулах түүхэн сорилттой үед Монгол Улсын Ерөнхий сайд Япон Улсад биечлэн хүрэлцэн ирсэнд, мөн гадаад улс оронд хийж буй анхны айлчлалаа Япон Улсаас эхлүүлсэнд талархаж Ерөнхий сайд Л.Оюун-Эрдэнэд найрамдал, нөхөрлөлийн бэлгэ тэмдэг болгож акита үүлдрийн нохой бэлэглэжээ.
Гэхдээ халдварын эрсдэлээс сэргийлж акита үүлдрийн нохойны чихмэлийг Япон Улс дахь Монгол Улсын Элчин сайдын яамаар дамжуулан Ерөнхий сайдад хүргүүлсэн байна. Харин нохойг цар тахал намжих үед илгээхээ уламжилжээ.
Акита үүлдрийн нохой нь Японы Акита муж орчмоос гаралтай бөгөөд эр зориг, үнэнч сэтгэлийн бэлгэдэл гэдгээрээ алдартай. Эзнээ 10 жил хүлээсэн домогт Хачико нохой нь акита үүлдрийнх бөгөөд түүний үнэнч сэтгэлийг алдаршуулж Японы Токио хотын Шибүя дүүргийн төмөр замын өртөөнд Хачико хөшөөг босгожээ.
Сонирхуулахад, Ерөнхий сайд ийн бэлэг болгож байгаа нь анхны бөгөөд өмнө нь Абэ Шинзо асашорюү Дагвадоржид мөн Акита үүлдвэрийн нохой бэлэглэж байжээ.
Сэтгэгдэл бичих