Moderna компани мэдэгдэхдээ тэдний бүтээсэн Ковидийн эсрэг вакцин 12-оос 17 насны хүүхдүүдэд өндөр үр дүн үзүүлсэн хэмээжээ. Тус компанийн өсвөр насны хүүхдүүд дээр явуулсан туршилтад оролцож вакцины хоёр тунг тариулсан 3732 хүүхдүүдээс нэг нь ч КОВИД-19 тусаагүй байна. Харин хуурамч тун тариулсан хүүхдүүдээс дөрөв нь КОВИД-19 туссан аж.
Тун удахгүй тэрхүү судалгааны тухай тоо баримтыг гадаадын улс орнуудын эрүүл мэндийн захиргаанд өгч, өсвөр насны хүүхдүүдэд вакциндаа зөвшөөрөл авах хүсэлтээ гаргана хэмээн “Moderna” компани мэдэгджээ. Өсвөр насны хүүхдүүд КОВИД-19-ийн хүнд хэлбэрийг тусах магадлал маш бага байдаг. Гэсэн хэдийн ч халдварыг цааш нь тараах эрсдэлтэй тул мэргэжилтнүүд өсвөр насны хүүхдүүдийг вакцинжуулах нь цар тахлыг зогсооход тус болно гэж бодож байгаа юм.
Өмнө нь АНУ-ын Хүнс, эмийн удирдлагын газар болон Өвчнийг хянах, урьдчилан сэргийлэх төв “Pfizer/BioNTech”-ийн вакциныг 12-оос 15 насны хүүхдүүдэд тарихыг зөвшөөрсөн билээ. “Pfizer” компанийн явуулсан судалгаагаар тэдний вакцин өсвөр насны хүүхдүүдэд 100 хувийн үр дүн үзүүлсэн байна.
Эх сурвалж: BBC
Сэтгэгдэл бичих