УИХ-ын гишүүдийн санаачлан, боловсруулж буй хуулийн төслийг танилцуулж, санал авахад зориулсан lawforum.parliament.mn системийг өнгөрсөн оны сүүлчээс УИХ ашиглаж эхэлсэн.
Уг сайтад гишүүн бүрийн нэрээр санаачлан, боловсруулж буй хуулийн төслийг нь нээлттэй байршуулдаг. УИХ-д өргөн баригдаагүй, хэлэлцэж эхлээгүй хуулийн төслүүд гэсэн үг.
Энд байршсан УИХ-ын гишүүн Ё.Баатарбилэгийн санаачлан, боловсруулж буй Төрийн албаны тухай хуульд нэмэл, өөрчлөлт оруулах тухай хуулийн төсөл дэх зарим заалт шүүмжлэл дагуулаад байна.
Тодруулбал, түүний боловсруулж буй хуулийн төслийн 23.7-д “Энэ хуульд заасан төрийн жинхэнэ албаны ерөнхий шалгалтад тэнцсэн Дээд боловсролын санхүүжилт, суралцагчдын нийгмийн баталгааны тухай хуулийн 8.7-д заасан журмаар тодорхойлсон дэлхийн шилдэг их сургууль төгссөн иргэнд энэ хуулийн 23.2-т заасан ажилласан жилийг тогтоосон тусгай шаардлага хамаарахгүй” гэдэг өөрчлөлтийг Төрийн албаны тухай хуульд оруулахыг тусгасан байна.
Одоо мөрдөгдөж буй Төрийн албаны тухай хуулийн 23.2-т зааснаар төрийн захиргааны албан тушаалд томилогдох хүнд дараах шаардлага тавигддаг. Үүнд:
- 23.2.1.тэргүүн түшмэлийн ангилалд хамаарах албан тушаалд томилогдох бол төрийн албанд 16-аас доошгүй жил, үүнээс эрхэлсэн түшмэлийн албан тушаалд 8-аас доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх;
- 23.2.2.эрхэлсэн түшмэлийн ангилалд хамаарах албан тушаалд томилогдох бол төрийн албанд 12-оос доошгүй жил, үүнээс ахлах түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх;
- 23.2.3.ахлах түшмэлийн ангилалд хамаарах албан тушаалд томилогдох бол төрийн албанд 8-аас доошгүй жил, үүнээс дэс түшмэлийн албан тушаалд 4-өөс доошгүй жил ажилласан байх бөгөөд мэргэшүүлэх багц сургалтад хамрагдаж, төгссөн байх
Боловсруулалтын шатанд байгаа уг хуулийн төслөөс анхаарал татахуйц хоёр дахь өөрчлөлт нь Төрийн албаны зөвлөлийн даргын томилгоотой холбоотой.
Одоогийн мөрдөж буй хуулиар Төрийн албаны зөвлөлийн даргыг зөвлөлийн гишүүд дотроосоо нэр дэвшүүлэн саналаа нууцаар хурааж, олонхийн санал авсан хүнийг гурван жилийн хугацаагаар сонгоно. Зөвлөлийн даргыг нэг удаа улируулан томилж болно хэмээн заасан байдаг.
Тэгвэл Ё.Баатарбилэг гишүүний санаачилсан хуулийн төслийн 69.1-д “Зөвлөлийн даргыг Ерөнхий сайдын санал болгосноор Зөвлөлийн гишүүдээс Засгийн газар гурван жилийн хугацаагаар томилно. Зөвлөлийн даргыг нэг удаа улируулан томилж болно” гэжээ.
Ийнхүү эрхэм гишүүний санаачлан боловсруулж буй хуулийн төсөлд дэлхийн шилдэг их сургууль төгссөн л бол төрийн албанд ажилласан жил хамаарахгүйгээр төрийн захиргааны албан тушаалд томилогдож болох, Төрийн албаны зөвлөлийн даргыг Ерөнхий сайдын санал болгосноор томилдог болох өөрчлөлтүүдийг тусгажээ.
Сэтгэгдэл бичих