Xэд хоногийн өмнөөс дугуй нь түгжигдсэн хар өнгийн 570 автомашины зураг цахим орчинд мэр сэр үзэгдэж эхэлсэн. Гэтэл хууль хүчнийхэн Лексус-570 маркийн автомашин дотроос 2.7сая ам.доллар хураасан бөгөөд холбогдох эздийг эрэн сурвалжилж байна гэх мэдээлэл өчигдрөөс эрх баригч намын байраар хүчтэй явж эхэллээ. Мэдээлэл цацагдаж эхлэхтэй холбогдуулан цахим орчинд тодорхой тайлбаргүй тавигдаж эхэлсэн Шангрила зочид буудлын дорх авто зогсоолд байх мөнөөх хар өнгийн Лексус-570 маркийн автомашин дотроос мөнгө гарсан гэдэг барин тавим таамаг ч хөврөв. Эл автомашин тус буудлын дорх авто угаалгын баруун талын камергүй хэсэгт 3 жил болж байгаа гэнэ. Ингэхдээ дугуй нь түгжээтэй, хэн ч ирж авдаггүй хэрнээ хэн нэгэн тоос шороог нь арчиж үргэлжийн гялгар, цэмбэгэр байлгадаг гэдгийг тэндхийн ажилтнууд хэлж байгаа юм.
Зогсоолын төлбөр нь цаг минутаар гүйдэг тус газарт эзэнгүй машин хэд хоновол байгууллагын нь зүгээс хэдийнэ цагдаа дуудаад өгчих байсан тул машины эздийг Шангрила зочид буудлын эзэд болон тэдгээртэй холбоо хамаарал бүхий нөхөд байх ёстой гэх таамаглал олон олон хардлага, таамаг дундаас хамгийн оновчтой нь билээ. Тухайн машинаас 2.7сая ам.доллар хураасан юм бол хууль хяналтынхан машиныг нь яагаад хөдөлгөөгүй байгаа юм, тэгэхээр мэдээлэл худлаа гэх үгүйсгэлийг “Тэр машины түлхүүр хэд хэдэн хүнд байдаг бөгөөд машиныг мөнгө, бас бус зүйлс дамжуулан авдаг явуулын тээш” хэлбэрээр ашигладаг байсан байж болзошгүй тул бусад түлхүүр атгасан этгээдүүдийг олж авахаар зогсоолоос нь хөдөлгөөгүй гэсэн өөр нэгэн мэдээлэл няцааж байна. Ямартай ч зогсох тусам зоос гүйдэг зогсоол дээр 3 жил дугуй нь түгжээтэй байсан гэх Лексус-570 маркийн хар өнгийн автомашин олны анхаарлыг ийнхүү татаж, элдэв мэдээлэл хардлагыг дагуулж эхэллээ.
Түүнчлэн албан тушаал, авлигын өгөө авааг энд тэнд орхисон үнэтэй автомашиныг “явуулын тээш” хэлбэрээр ашиглан үйлддэг болсон гэлцэж байна. Энэ ч ортой байж болох. Машины дугуйг түгжсэн тул түлхүүр атгасан хэн нэгэн унаад явах боломжгүй ч дотор нь орхисон зүйлийг бол аваад гарахад хэн ч анзаарахгүй. Басхүү хэн ч тонохгүй… Харин жирийн иргэдийн ихэвчлэн унадаг приус, сонатанууд байсан бол аль хэдийнэ машинтай юутайгаа тоногдчих байсан биз.
Эх сурвалж: www.niigmiintoli.mn
Сэтгэгдэл бичих