Монгол Улсын Их Хурлын гишүүн Цэрэнжамцын Мөнхцэцэг, Чинбатын Ундрам нар “Үндэсний боловсролын тогтолцоог сайжруулах нь: Ерөнхий боловсролын сургууль дахь англи хэлний сургалт” сэдэвт хэлэлцүүлгийг санаачлан Төрийн ордонд 2020 оны 9 дүгээр сарын 23-ны өдөр зохион байгууллаа. Уг хэлэлцүүлэгт УИХ-ын гишүүд, Боловсрол, Шинжлэх Ухааны Яам зэрэг төрийн байгууллага; Монгол Улсын Боловсролын Их Сургууль, Боловсролын хүрээлэн, Багшийн мэргэжил дээшлүүлэх институт зэрэг мэргэжлийн байгууллага; Шинэ үе бүрэн дунд сургууль зэрэг сургууль, олон нийтийн байгууллагын төлөөлөл, эрдэмтэн судлаачид оролцлоо.
Хэлэлцүүлэгт Боловсролын хүрээлэнгийн эрдэм шинжилгээний ажилтан, доктор Н.Ундармаа “Ерөнхий боловсролын сургууль дахь англи хэлний хөтөлбөр, боловсролын чиг хандлага”; МУБИС-ийн багш, доктор О.Мягмарсүрэн “Монгол Улсын боловсролын салбар дахь англи хэлний бодлого, хэрэгжилт, үр дүн”; “Шинэ үе” сургуулийн англи хэлний багш Ч.Нарангэрэл “Англи хэлний багш нарын өнөөгийн нөхцөл байдал, тулгамдсан асуудлууд”; Багшийн мэргэжил дээшлүүлэх институтийн англи хэлний мэргэжилтэн С.Алдармаа “Багш нарын мэргэжлийн ур чадварыг хөтөлбөрийн хүрээнд дээшлүүлэх”; “Q education” группийн үүсгэн байгуулагч Ц.Алтансор “Багшийн хөгжил, үнэлгээний аргаар англи хэлний сургалтын чанарыг сайжруулах нь” сэдвээр тус тус илтгэл тавив. Оролцогчид дурдсан илтгэлтэй холбоотой асуулт хариулт, санал шүүмж хэлж, сэдвийн хүрээ, шийдвэрлэх арга замын талаар хэлэлцлээ.
УИХ-ын гишүүн Ц.Мөнхцэцэг, Ч.Ундрам нар 9 дүгээр сарын 4-нд “Үндэсний боловсролын тогтолцоог сайжруулах нь” сэдвээр “Төрөөс баримтлах боловсролын бодлого хүүхэд бүрд тэгш, хүртээмжтэй байхад чиглэх, Үндэсний хөтөлбөрийг сайжруулан хэрэгжүүлэх” талаар хэлэлцүүлэг өрнүүлж байсан билээ. Өнөөдрийн хэлэлцүүлэг дурдсан хэлэлцүүлгийн үргэлжлэл бөгөөд боловсролын тэгш хүртээмжийг нэмэгдүүлэх, англи хэлний сургалтын чанарыг сайжруулахад анхаарах суурь асуудлыг хөндсөн болно.
Сэтгэгдэл бичих