Энэ жилийн эхээр Bong Joon Ho найруулагчийн “Parasite” (2019) уран сайхны кино Оскарын наадмаас дөрвөн том шагналыг хүртсэнээр БНСУ-ын кино урлаг дэлхийд эрчимтэйгээр танигдаж эхэлсэн билээ. Цуврал киноны хувьд ч мөн адил “Crash Landing On You”, “Itaewon Class”, “It”s Okay To Not Be Okay” зэрэг олон ангит кинонууд сүүлийн үед олны анхаарлыг ихээр татаад байгаа юм.
Ийнхүү К-Драма дэлхий дахинд алдаршиж байгаа тул Филиппин Улсын Их Сургууль сургалтын хөтөлбөртөө БНСУ-ын олон ангит кинонуудад дүн шинжилгээ хийх сонгон судлалын хичээл нэмжээ. Тухайлбал, “Crash Landing On You”, “Chicago Typewriter”, “Misaeng: Incomplete Life” гэх гурван киног үзсэн бол уг хичээлийг сонгож болох аж.
“К-Драма судлал” хичээлд дээд тал нь 25 оюутан хамрагдах боломжтой ч одоогоор 200 гаруй оюутан сонгон судлах хүсэлтээ өгчээ. Харин “COVID-19” цар тахлын онцгой нөхцөл байдлын улмаас тус сургууль Google Meet, Zoom зэрэг аппликейшн ашиглаж, хичээлээ онлайнаар зохион байгуулах юм байна.
