Таныг АН-тай тохироо хийсэн гэж хардах хүмүүс их байна. Яагаад АН-ыг сонгосон юм бэ?
-2012-2016 онд МАХН, АН хоёр хамтарсан Засгийн газар байгуулж байсан. Энэ үед хэдийгээр засаг барьж байсан ч миний бие шүүмжлэлтэй ханддаг байсан м. Өөрөөр хэлбэл, эрх баригч нам дотроо сөрөг хүчний үүрэг гүйцэтгэсэн гэсэн үг.
Дараагийн сонгуулиар АН-аас ес, МАХН-аас би ганцаараа орж ирсэн. Ганцаараа байгаа ч гэсэн 65-ийн эсрэг сөрөг хүчин болох үүрэг гарсан. Нөгөөтээгүүр, ялагдалдаа дүгнэлт хийх ёстой байсан. Учир нь бодлого нь буруу. Дээр нь Эрдэнэтийн 49 хувь зэрэг олон асуудал дээр иргэд гомдчихсон байсан.
Өнөөдөр МАН 65 суудалтай учраас гомдоллох зүйл байхгүй. Орон нутагт 90 хувь, Их Хуралд 90 хувь, хууль хяналтын байгууллагаа 100 хувь авчихсан. Тэр бүү хэл Ерөнхийлөгчөө хүртэл халаасандаа хийчихсэн шүү дээ.
Төмөр өргөдөг газар очоод Ерөнхийлөгчөө халаасандаа хийчихсэн. Ерөнхий сайд нь ч өөрсдийнх нь хүн. Тэдний хэлээд байдаг МАНАН мафи арилчихсан учраас одоо үр дүн хэрэгтэй.
Иргэдийг баяжуулж, сайхан амьдруулна, шударга ёсыг тогтооно гэсэн амлалтаа биелүүлээч. Уг нь шударга ёсыг өөрсдөөсөө эхлэх ёстой шүү дээ. Гуравдугаарт, төрийг эмхэлж, журманд нь оруулна гэж амалсан.
Энэ эмх цэгцээ өгөөч. Аль ч амлалтаа биелүүлээгүй учраас сөрөг хүчин нэгдэхээс өөр арагүй. Тиймээс хүссэн хүсээгүй АН бодит сөрөг хүчин мөн.
-АН өөрөө дотооддоо маш их зөрчилтэй байгаа шүү дээ?
-Энд байгаа намын дарга, гишүүнээр АН-ыг дүгнэх хэрэггүй. Би 1994-2011 хүртэл АН-ыын гишүүн байсан. Намаас яагаад гарсан бэ гэж хүмүүс асуухаа больж. Ойлгомжтой шүү дээ. Олон түмний нүдэн дээр намаасаа найман удаа хөөгдсөн.
-АН-д элсэн орохоо мэдэгдэхдээ С.Эрдэнэ даргатай хамт авахуулсан зурган дээрээ сонголтондоо нэг л итгэлгүй байгаа мэт харагдаж байсан талаар иргэд сонгогчид нар дүгнэсэн байна лээ?
-Хүнийг ямар өнцгөөр зураг авч олон нийтэд тараах л зүйл байгаагаас Ан-ын авсан зурган дээр хамгийн хөгжилтэй, баяртай байгаа хүн нь би байсан. Миний хувьд найман жил бие даагч хийлээ.
45 нас ч хүрлээ. Хуучин Үндсэн хуулиар Ерөнхийлөгчид ч нэр дэвших нас байна шүү дээ. Тиймээс улс төрийг томоор харж, улс оронд юм хиймээр байна.
-Та сөрөг хүчний хувьд АН болон МАН-ын үйл ажиллагаанд гол шүүмжлэлттэй ханддаг байсан хүний нэг. Сүүлийн үеийн чуулганаар үг хэлж, асуудал хөндөх нь цөөрсөн гэж иргэд дүгнэж байгаа. Намын бодлоготой холбоотой юу?
-Манайхан чуулган хуралдаад байна гэж хараад байгаа болохоос биш чуулган хуралдахгүй байгаа гэж боддог. Аливаа санал хураалтыг илээр хураах ёстой. Гэтэл цахим чуулганаар Чингис хааны танхимд наймаас найм зэргээр санал хурааж байна.
Үнэхээр тийм ч юм уу гүй ч юм уу бид мэдэхгүй. Их танхимд байхад ядаж бичлэг хийгээд үнэн худал нь ил тод харагддаг байсан. Би олон нийтэд бичлэг хийж байгаад 10 мянган цагийн таслалтыг 1000 цаг болгож кнопоор санал хурааж, Дэгийн тухай хууль санаачлаад батлуулж байсан хүн шүү дээ би. Энэ цаг үед илжигний чихэнд алт хийсэн ч сэгсэрнэ, ус хийсэн ч сэгсэрнэ гэгчээр миний шүүмжлэх өөрөө утгагүй болчихоод байгаа юм.
-Цар тахлын үед хэрэгжих хууль баталсан. Хэрэгжих боломжийг у гэж харж байгаа вэ?
-Ард түмнийг яаж дэглэх вэ, хэрхэн зовоож шулан мөлжих вэ гэдэг санаа байгаа болохоос биш улс оронд хэрэгтэй юм юу хийсэн юм бэ. Хоёрхон хоногийн өмнө баар нээгээд өнөөдөр хаагаад л. Тэгсэн хэрнээ гадаадад байгаа иргэдээ авчрахгүй. Уг нь авчрах боломжтой шүү дээ. Иргэд онгоц гаргаад өг гэж хүсээгүй.
Харин улсын хил дээр ямар нэгэн аргаар яваад очъё. Та нар намайг хил рүү оруул гэхээр иргэндээ хилээ нээхгүй гээд суугаад байх юм. Сүүлийн үед бодит мэдээлэл авахад хэцүү болчихоод байна. Бүгдээрээ шоу болж хувирсан. Өөрөөр хэлбэл, иргэд мэдээллийн өлсгөлөнд орсон гэсэн үг.
Сэтгэгдэл бичих