Монгол Улс, АНУ-ын хооронд шууд нислэг үйлдэх бэлтгэл ажлын хүрээнд Зам, тээврийн сайд Б.Дэлгэрсайхан тус улсын Тээврийн аюулгүй байдлын захиргаа (TSA)-ны удирдлагуудтай уулзаж, нисэхийн аюулгүй байдлыг хангах чиглэлээр санал солилцжээ.
Уулзалтад TSA-ны Тээврийн аюулгүй байдлын захиргааны ддарга Дэвид П.Камминс болон Олон улсын үйл ажиллагаа хариуцсан Ази, Номхон далайн бүсийн захирал Стефани Мецгер нар оролцсон байна.
Уулзалтаар нисэхийн аюулгүйн хамгаалалтыг бэхжүүлэх, нисэх буудлын аюулгүйн үзлэгийн тоног төхөөрөмжийг шинэчлэх, салбарын мэргэжилтнүүдийг сургаж, чадавхжуулах асуудлыг хэлэлцжээ.
Монгол Улсын Засгийн газар хоёр улсын стратегийн түншлэлийн хүрээнд иргэний нисэхийн салбарын хамтын ажиллагааг өргөжүүлж, шууд нислэг үйлдэх нөхцөлийг бүрдүүлэхэд анхаарч байгааг сайд Б.Дэлгэрсайхан онцолсон байна. Энэ хүрээнд иргэний нисэхийн аюулгүй ажиллагааны хяналтын тогтолцоог олон улсын шаардлагад нийцүүлж, АНУ-ын Холбооны нисэхийн захиргааны олон улсын нисэхийн аюулгүй ажиллагааны үнэлгээгээр нэгдүгээр ангилалд хүрэх зорилт тавьжээ.
Монгол Улсын Иргэний нисэхийн ерөнхий газар болон АНУ-ын TSA 2021 оноос нисэхийн аюулгүйн хамгаалалтын чиглэлээр хамтран ажиллаж эхэлсэн. Энэ хугацаанд “Чингис хаан” олон улсын нисэх буудлын аюулгүйн хамгаалалтын үйл ажиллагаанд үе шаттай үнэлгээ, шалгалт хийжээ.
Түүнчлэн талууд 2024 онд аюулгүйн хамгаалалттай холбоотой эмзэг мэдээлэл солилцох гэрээ байгуулсан байна. Монголын тал 2025 оны иж бүрэн үнэлгээгээр өгсөн зөвлөмжүүдийг бүрэн хэрэгжүүлснийг 2026 оны наймдугаар сарын давтан шалгалтаар тогтоожээ.
Мөн АНУ-ын Засгийн газрын гурван сая ам.долларын буцалтгүй тусламжаар “Чингис хаан” олон улсын нисэх буудлын аюулгүйн үзлэгийн тоног төхөөрөмжийг шинэчлэх төсөл хэрэгжүүлж байна. Төслийн хүрээнд рентген төхөөрөмж, хүний биед үзлэг хийх сканнер, тэсрэх бодис болон металл илрүүлэх зэрэг нийт 24 тоног төхөөрөмж нийлүүлэхээр төлөвлөжээ.
Үүнээс гадна АНУ-ын Худалдаа, хөгжлийн агентлагийн 2.2 сая ам.долларын буцалтгүй тусламжаар “Нисэхийн аюулгүй байдлын стандартын техникийн тусламж” төслийг “Викс” групптэй хамтран хэрэгжүүлж байгаа аж. Тус төсөл 2026 оны тавдугаар сараас эхлэн 18 сарын хугацаанд үргэлжлэхээр төлөвлөгджээ.
Хамтын ажиллагааны хүрээнд нисэхийн аюулгүйн хамгаалалтын хяналтын байцаагч, аюулгүйн үзлэгийн шалгагч, инженер, техникийн ажилтнуудад зориулсан сургалтыг үе шаттай зохион байгуулахаар талууд санал солилцсон байна.

Эх сурвалж: Зам, тээврийн яам












Сэтгэгдэл бичих