Монголын Үндэсний Худалдаа, Аж Үйлдвэрийн Танхим, Жижиг, дунд үйлдвэрлэлийн газар болон Монголын ноос, ноолуурын холбооны удирдлага, гишүүн байгууллага, аж ахуйн нэгжүүдийн төлөөлөл шинээр томилогдсон Монгол Улсын Онц бөгөөд Бүрэн эрхт Элчин сайд нартай ажил хэргийн уулзалт зохион байгуулав.
Уулзалтын хүрээнд танхим, мэргэжлийн холбоод болон дипломат төлөөлөгчийн газруудын хамтын ажиллагааг бэхжүүлэх, гадаад эдийн засгийн хамтын ажиллагааг өргөжүүлэх, экспорт, хөрөнгө оруулалтыг нэмэгдүүлэх чиглэлээр санал, санаачлагын талаар харилцан мэдээлэл солилцож, үр дүнтэй хэлэлцүүлэг өрнүүлэв.
Монголын Үндэсний Худалдаа, Аж Үйлдвэрийн Танхимын Ерөнхийлөгч Б.Лхагважав нээлтийн үг хэлж, хувийн хэвшлийн оролцоог нэмэгдүүлэх, экспортын зах зээлийг тэлэхэд дипломат төлөөлөгчийн газруудын үүрэг, оролцоо чухлыг онцлов. Тэрээр шинээр томилогдсон элчин сайд нарт гадаад худалдаа, хөрөнгө оруулалтыг дэмжих чиглэлээр идэвх санаачилгатай ажиллах, уул уурхайн бус экспортыг нэмэгдүүлэх бодит боломж, нөөцийн талаар саналуудыг танилцууллаа.
Мөн Жижиг, дунд үйлдвэрлэлийн газрын дарга Я.Эрдэнэсайхан танилцуулга хийж, дотоодын үйлдвэрлэл эрхлэгчдийг гадаад зах зээлд гаргах боломж, тулгамдаж буй асуудал, хамтын ажиллагааны боломжит гарцын талаар дэлгэрэнгүй мэдээлэл өгч, оролцогчдын дунд хэлэлцүүлэг өрнүүлэв.
Монгол Улсын Ерөнхийлөгчийн санаачилсан “Цагаан алт” хөтөлбөрийн хүрээнд ноос, ноолуур, арьс ширний салбарын өнөөгийн нөхцөл байдал, экспортын боломж, тулгамдаж буй асуудлыг Ерөнхийлөгчийн зөвлөх Б.Жавхлан танилцуулж, аж ахуйн нэгжүүдийн төлөөлөл бодит санал, байр сууриа илэрхийллээ.
Уулзалтад Монгол Улсаас гадаадын 20 оронд суух шинээр томилогдсон Элчин сайд нар оролцож, хоёр талын худалдаа, эдийн засгийн хамтын ажиллагааг эрчимжүүлэх, үндэсний үйлдвэрлэгчдийг дэмжих, хөрөнгө оруулалт татах чиглэлээр идэвхтэй хамтран ажиллахаа илэрхийллээ.
Талууд цаашид дипломат төлөөлөгчийн газруудаар дамжуулан бизнесийн холбоо, хөрөнгө оруулагчдын хамтын ажиллагааг өргөжүүлэх, экспортын бүтээгдэхүүний нэр төрөл, хэмжээг нэмэгдүүлэхэд онцгой анхаарч ажиллахаар санал нэгдэв.
Сэтгэгдэл бичих