МАН-ын Ерөнхий нарийн бичгийн дарга Я.Содбаатар Бага хурлын III хуралдааны шийдвэрийн талаар мэдээлэл өглөө. Тэрбээр тус хуралдаан амжилттай болж өндөрлөсөн бөгөөд хоёр үндсэн асуудлыг хэлэлцсэн гэдгийг онцолсон юм.
Хуралдаанаар Монгол Улсын Ерөнхий сайдад нэр дэвшүүлэх асуудлыг хэлэлцэж, МАН-ын дарга Ням-Осорын Учрал-ыг нэр дэвшүүлэх нь зүйтэй гэж үзэн намын гишүүдийн 99.7 хувийн саналаар дэмжсэн байна. Ийнхүү Бага хурлын шийдвэр гарсан тул Ерөнхий сайдыг томилох үйл явц цаашид хуульд заасан журмын дагуу үргэлжлэх аж.
Мөн хуралдаанаар УИХ дахь МАН-ын бүлэг болон намын Удирдах зөвлөлд чиглэл өгөх тогтоолын төслийг баталжээ. Уг тогтоолд Ойрхи Дорнодод үүсээд буй нөхцөл байдлаас үүдэлтэй дэлхийн эдийн засгийн хүндрэлд бэлтгэх, хохирол багатай даван туулах цогц хөтөлбөр боловсруулах чиглэлийг тусгасан байна. Үүнээс гадна УИХ дахь МАН-ын бүлгийн гишүүдэд намын дотоод эв нэгдлийг хангах, үндэсний язгуур эрх ашгийг дээдлэх, Засгийн газрын үйл ажиллагааг тогтвортой үргэлжлүүлэхэд дэмжлэг үзүүлэх үүргийг өгчээ.
Намын дарга Н.Учрал Ерөнхий сайдын албан тушаалд томилогдсон даруйдаа Засгийн газрын бүрэлдэхүүнийг шуурхай байгуулах байр суурь илэрхийлсэн талаар Я.Содбаатар дурдсан. Харин сайд нарын асуудлыг намын Удирдах зөвлөлийн түвшинд хэлэлцэх аж.
Түүнчлэн МАН авлига, хээл хахууль, улс орны язгуур эрх ашгийн эсрэг аливаа үйлдэлтэй эвлэрэхгүй гэсэн байр сууриа дахин нотолсон байна. Харин Гомбожавын Занданшатар-ын тэргүүлсэн Засгийн газар алдаа гаргасны улмаас бус, төрийн үйл ажиллагааг гацаанаас гаргах зорилгоор Ерөнхий сайд өөрийн хүсэлтээр чөлөөлөгдсөн гэж тайлбарлалаа.
Сэтгэгдэл бичих