Дайн эхэлснээс хойш Ираны нийт пуужингийн ойролцоогоор гуравны нэгийг устгасан талаар Reuters агентлаг Америкийн тагнуулын мэдээлэлд ойр эх сурвалжуудаас эш татан мэдээлжээ.
Гэвч устгасан гэх пуужингуудын хэд нь бодитоор бүрэн устсан, эсвэл бөмбөгдөлтөд өртсөн бункер, хонгил дотор эвдэрч, нурангинд дарагдсан эсэх нь тодорхойгүй хэвээр байна. Мөн эх сурвалжуудын мэдээлснээр АНУ, Израилын хамтарсан ажиллагааны хүрээнд Ираны дронуудын ойролцоогоор гуравны нэгийг мөн устгасан байна.
Тагнуулын үнэлгээгээр Иранд одоогоор харвах боломжтой нэлээд хэмжээний пуужингийн нөөц үлдсэн бөгөөд зэвсэглэл бүрэн саармагжаагүй гэж үзэж байгаа аж. Цаашлаад, дайны дараа нурангин дор үлдсэн пуужинг сэргээн засварлах боломжтой талаар эх сурвалж онцолжээ.
Israel Defense Forces-ийн мэдээлснээр, Израилын нутаг дэвсгэрт хүрэх боломжтой 2500 гаруй баллистик пуужин Иранд байсан бөгөөд дайны явцад пуужин хөөргөгч төхөөрөмжүүдийн 70 орчим хувийг устгасан байна.
Харин Дональд Трамп саяхан мэдэгдэхдээ “Бид тэдний пуужингийн 99 хувийг устгасан. Гэхдээ үлдсэн нэг хувь нь ч аюултай хэвээр” хэмээн онцолж, аюул бүрэн арилгагдаагүйг сануулжээ.
Ийнхүү талуудын өгч буй мэдээлэл, үнэлгээ харилцан зөрүүтэй байгаа нь бодит нөхцөл байдлыг бүрэн тодорхойлоход хүндрэлтэй байгааг ажиглагчид онцолж байна.
Сэтгэгдэл бичих