Гашуунсухайт–Ганцмод боомтыг холбох хил дамнасан төмөр зам ашиглалтад орсноор Монгол Улсын төмөр замын экспортын хэмжээ жилд 30 сая тонноор нэмэгдэж, тээврийн зардал мэдэгдэхүйц буурах боломжтой гэж Зам, тээврийн яамнаас мэдээллээ.
Мөн энэхүү төмөр зам баригдсанаар Монгол Улс Ази, Европыг холбосон дамжин өнгөрөх тээврийн хоёр дахь гарцтай болж, экспортын орлого жилд 1.5 тэрбум ам.доллароор өсөх тооцоо гарчээ. Үүний үр дүнд нэг хүнд ногдох дотоодын нийт бүтээгдэхүүний хэмжээ 10 мянган ам.долларт хүрэх боломж бүрдэх юм.
Зам, тээврийн сайд Б.Дэлгэрсайхан өнгөрсөн оны тавдугаар сараас эхлэн 10 хувийн гүйцэтгэлтэй үргэлжилж буй төслийн ажлын явцтай танилцлаа. Одоогоор төмөр замын доод бүтцийн хүрээнд газар шорооны хөрс хуулалт, жаазан гүүрийн их биеийн бетон цутгалт, дөрвөлжин болон дугуй хоолойн бетон хийцийг нийт 13 байршилд гүйцэтгэж байна.
Түүнчлэн 9.5 км урт гүүр барихаас 1330 ширхэг шон суурь өрөмдөж, тулгуурын хөндлөн нуруу болон завсрын тулгуурыг угсарчээ. Мөн 4 км урт, 35/10 кВт-ын гурван хэлхээт түр цахилгаан хангамжийг угсраад байна.
Энэхүү бүтээн байгуулалт нь нарийн царигийн 10.8 км, өргөн царигийн 8.7 км төмөр замтай, нийт 32.6 км урттай байх бөгөөд нарийн царигаар жилд 20 сая, өргөн царигаар 30 сая тонн хүртэлх ачаа тээвэрлэх хүчин чадалтайгаар 2027 онд ашиглалтад оруулахаар төлөвлөжээ.
Мөн хил дамнасан төмөр зам ашиглалтад орсноор байнгын 200, түр 800 ажлын байр шинээр бий болж, орон нутгийн хөдөлмөр эрхлэлтийг дэмжихээс гадна Монгол, Хятадын Шивээхүрэн–Сэхээ, Бичигт–Зүүнхатавч, Ханги–Мандал зэрэг хилийн боомтуудыг төмөр замаар шат дараатай холбох нөхцөл бүрдэх юм.
Сэтгэгдэл бичих