СӨҮЛ, 2026 оны гуравдугаар сарын 9 /Yonhap/. Өмнөд Солонгос, АНУ-ын цэргийн хамтарсан “Freedom Shield” сургуулилалт эхэлжээ. Уг сургуулилалт гуравдугаар сарын 19-ний өдрийг хүртэл үргэлжилнэ.
Энэ онд хээрийн дадлага сургуулилалтын тоог хоёр гаруй дахин цөөрүүлсэн байна. Өнгөрсөн онд 51 удаа сургуулилалт хийсэн бол энэ онд 22 удаа хийхээр төлөвлөжээ. Өмнөд Солонгосын эрх баригчид Солонгосын хойгт хурцадмал байдал үүсгэхгүй байх үүднээс цэргийн хээрийн сургуулилалтыг жилийн туршид өмнөхөөс илүү жигд хуваарилан зохион байгуулахаар төлөвлөжээ. Умард Солонгосын эрх баригчид АНУ-Өмнөд Солонгосын хамтарсан сургуулилалтыг дайн өдөөх бэлтгэл гэж үздэг.
Өмнөд Солонгосын Ерөнхийлөгч Ли Жэ Мёны засаг захиргаа өмнөх Ерөнхийлөгчийн засаг захиргаанаас ялгаатай нь Пёньянтай яриа хэлэлцээ хийхийг эрмэлзэж байгаа юм.
Энэ удаагийн сургуулилалтад 18 мянга орчим цэргийн алба хаагч оролцож байгаа нь өмнөх оныхтой ойролцоо байна. Сургуулилалтын үеэр “орчин үеийн дайны үеийн тактикуудыг” боловсруулна. Мөн дайны үед зэвсэгт хүчний шуурхай командлалыг АНУ-аас Өмнөд Солонгост шилжүүлэх нөхцөл бүрдсэн эсэхийг үнэлэх ажээ. Өмнөд Солонгосын засаг захиргаа энэ эрхийг Ерөнхийлөгч Ли Жэ Мёны бүрэн эрхийн хугацаа дуусахаас өмнө буюу 2030 он гэхэд буцаан авахыг зорьж байна.
Сэтгэгдэл бичих