Эрдэнэт үйлдвэр ТӨҮГ-ын худалдан авах үйл ажиллагааны үр ашгийг дээшлүүлэх, ил тод байдыг хангах, хүний хүчин зүйлээс үүдэлтэй алдааг бууруулах, авлигаас ангид байх зорилгоор хиймэл оюун ухаанд суурилсан тендерийн үнэлгээний системийг хөгжүүлж, нэвтрүүлжээ.
Тус үйлдвэр жилд 1360 гаруй тендер зохион байгуулж, тендерт давхардсан тоогоор 4500 гаруй компани оролцдог байна. Тендерийн үнэлгээнд 300 гаруй ажилтан үндсэн ажлын хажуугаар ажиллаж, жилд 65712 цаг зарцуулж, 2.3 тэрбум төгрөгийн зардал гардаг гэсэн тооцоо хийжээ.
Үүнээс жилд 380 гаруй тендерт гомдол, санал гарч үйлдвэрийн үндсэн үйл ажиллагаанд шаардлагатай бараа материал цаг хугацаандаа нийлүүлэгдэхгүй байх эрсдэл үүсдэг байна.
Иймд дээрх алдаа, дутагдлыг арилгах зорилгоор технологийн шийдлийг нэвтрүүлсэн бөгөөд хиймэл оюунд суурилсан TenderEval үнэлгээний системийг нэвтрүүлэх судалгааны ажлыг 2022 онд эхлүүлж, 2024 онд туршилт хийсэн бол 2025 оны 7-р сараас үйл ажиллагаандаа бүрэн ашиглаж эхэлжээ.
Өмнө нь тендерийн эхний шатны шалгаруулалтыг 10 гаруй хоногт хийдэг байсан бол хиймэл оюуныг нэвтрүүлснээр хоёр хоногт гүйцэтгэдэг болжээ. Мөн цаасны хэрэглээг 100 хувь халж, хүн цагийн ачааллыг тав дахин бууруулсан байна.
Сэтгэгдэл бичих