Монгол Улсын Ерөнхий сайд Г.Занданшатар ШХАБ-ын гишүүн орнуудын Засгийн газрын тэргүүн нарын зөвлөлийн өргөтгөсөн хуралдаанд оролцохоор ОХУ-ын Москва хотыг зорьсон айлчлалын бүрэлдэхүүнд Зам, тээврийн сайд Б.Дэлгэрсайхан тэргүүтэй зам, тээврийн салбарын төлөөлөгчид дагалдан ажиллаж, айлчлалын хүрээнд салбар тус бүрт ажил хэрэгч уулзалтуудыг хийв.
Энэ хүрээнд Засгийн газрын хэрэгжүүлэгч агентлаг Төмөр замын газрын дарга Б.Артур 2025 оны 11 дүгээр сарын 18-ны өдөр Москва хотноо зохион байгуулагдаж буй “Тээврийн 7 хоног” арга хэмжээнд оролцож, энэ үеэр ОХУ-ын Холбооны төмөр замын тээврийн агентлагийн дарга А.Г.Сахаров, “Оросын төмөр замууд” НХН-ийн Ерөнхий захирлын нэгдүгээр орлогч, Монгол-Оросын “Улаанбаатар төмөр зам” ХНН-ийн Удирдах зөвлөлийн дарга С.А.Павлов нартай уулзаж хамтын ажиллагааг өргөжүүлэх зарим асуудлыг хэлэлцлээ.
Уулзалтаар Монгол-Орос-Хятадын эдийн засгийн коридор байгуулах хөтөлбөрийн хүрээнд төмөр замын Төв коридорыг шинэчлэх ТЭЗҮ-г нэгтгэх, Зүүн коридорын бүтээн байгуулалтыг ижил механизмаар гурван улсаараа хамтран урагшлуулах, түүнчлэн Монгол-Оросын хувь нийлүүлсэн “УБТЗ” нийгэмлэгтэй холбоотой суурь бүтцийг холбох журам, ачаа тээврийн хэмжээг нэмэгдүүлэх зэрэг олон талт асуудлаар харилцан мэдээлэл солилцож, илүү өргөн хүрээтэй хамтран ажиллахаар санал солилцлоо.
Мөн 2026 оны 4 дүгээр сард ОХУ-ын Санк-Петербург хотноо зохион байгуулагдах ОХУ-ын анхдугаар “Тээвэр, ложистикийн форум” арга хэмжээний үеэр хоёр байгууллагын Хамтын ажиллагааны санамж бичгийг байгуулахаар тохиролцлоо
Сэтгэгдэл бичих