Д.Есболат нь 2021-2023 оны 06 дугаар сарын хооронд Баян-Өлгий аймгийн Өлгий сумын Засаг даргаар ажиллаж байхдаа өөрт олгогдсон эрхийг хэтрүүлэн ашиглаж Тамхины хяналтын тухай хуулийн хориглосон заалтыг зөрчиж Өлгий сумын Засаг даргын тамгын газрын худалдаа үйлчилгээ хариуцсан мэргэжилтэн Ж.Мурат, мөн сумын Засаг даргын орлогч Х.Нурболаттай бүлэглэн хамтран оролцож албан үүрэг, бүрэн эрх, албан тушаалын байдлаа урвуулан ашиглаж, хийх ёсгүй үйлдэл хийж Ерөнхий боловсролын сургуулийн хичээлийн болон дотуур байраас 500 метр дотор байрлах хүнсний нэр бүхий дэлгүүрүүдэд тамхи худалдан борлуулах тусгай зөвшөөрлийг 2 жилийн хугацаатайгаар олгож бусдад давуу байдал бий болгосон гэмт хэргийг албан тушаалын байдлаа урвуулан ашиглаж үйлдсэн гэх хэрэгт холбогдож прокуророос 2025 оны 02 дугаар сард яллах дүгнэлт үйлдэн шүүхэд хүргүүлжээ.
Анхан шатны шүүх 2025 оны 05 дугаар сард хэргийг хэлэлцээд: нийтийн албан тушаалтан албан үүрэг бүрэн эрх, албан тушаалын байдлаа урвуулан ашиглаж бусдад давуу байдал бий болгох гэмт хэргийг бүлэглэн, хамтран оролцож үйлдсэн гэм буруутайд тооцож, шүүгдэгч Д.Есболатыг нийтийн албанд томилогдох эрхийг 2 жил 6 сарын хугацаагаар хасаж, 1 жил 8 сарын хугацаагаар зорчих эрхийг хязгаарлах ял, шүүгдэгч Х.Муратыг нийтийн албанд томилогдох эрхийг 2 жил 6 сарын хугацаагаар хасаж, 1 жил 8 сарын хугацаагаар зорчих эрхийг хязгаарлах ял, шүүгдэгч Х.Нурболатыг нийтийн албанд томилогдох эрхийг 2 жил 6 сарын хугацаагаар хасаж, 8 сая төгрөгөөр торгох ял тус тус оногдуулж шийдвэрлэжээ.
Давж заалдах шатны шүүх: анхан шатны шүүхийн дүгнэлт үндэслэл бүхий болсон, оногдуулсан ял нь тэдгээрийн үйлдэлт тохирсон гэх дүгнэлтийг хийж анхан шатны шүүхийн шийтгэх тогтоолыг хэвээр үлдээж шүүгдэгч нар болон тэдгээрийн өмгөөлөгчдийн гаргасан давж заалдах гомдлыг тус тус хэрэгсэхгүй болгож шийдвэрлэлээ.
БАЯН-ӨЛГИЙ АЙМГИЙН ЭРҮҮ, ИРГЭНИЙ ХЭРГИЙН ДАВЖ ЗААЛДАХ ШАТНЫ ШҮҮХИЙН 2025 ОНЫ 11 ДҮГЭЭР САРЫН 07-НЫ ӨДРИЙН ШҮҮХ ХУРАЛДААН
Сэтгэгдэл бичих