Дулааны улиралд нийслэлийн зам талбайг хэсэгчлэн хааж, засвар хийж, шинээр зам тавидаг. Энэ зун аль хэсэгт зам засвар хийж, шинээр зам тавихыг Нийслэлийн автозамын хөгжлийн газрын орлогч дарга Б.Индрагаас тодрууллаа.
-Энэ зун нийслэлийн аль хэсэгт шинээр зам тавих вэ?
-Нийслэлийн зам засвар болон шинээр тавих замын ажлын төлөвлөгөө гаргасан. Төлөвлөгөөг нийслэлийн Засаг даргаар батлуулсны дараа задаргааг дэлгэрэнгүйгээр мэдээлж болно.
-Өнгөрсөн жил эхлүүлсэн томоохон ажлууд хэдэн хувьтай явна вэ. Тухайлбал, Замын цагдаагийн гүүрэн гарц хэзээ ашиглалтад орох вэ?
-Гүүр барих ажил төлөвлөгөөний дагуу хэвийн үргэлжилж байгаа. Замын цагдаагийн гүүрэн гарцын ажил одоогоор 43 хувьтай явна. Бид энэ гүүрэн гарцыг есдүгээр сард эцсийн байдлаар хүлээлгэж өгнө.
-Налайхын замыг арваннэгдүгээр сард ашиглалтад оруулна гэж байсан. Энэ хугацаандаа ашиглалтад орж чадах уу?
-Налайхын замын ажлын гэрээ хийгдээд явж байгаа. Бид төлөвлөгөөний дагуу ашиглалтад оруулахыг зорих болно.
БНХАУ-ын Засгийн газраас Монгол Улсын Засгийн газарт олгож буй нэг тэрбум ам.долларын хөнгөлөлттэй зээлийн хөрөнгөөр хэрэгжүүлэхээр төлөвлөж буй “Гачууртын уулзвараас Налайх-Чойрын уулзвар хүртэлх 20.9 км авто зам барих” төслийн замын барилгын ажлыг дөрөвдүгээр сард эхэлж, арваннэгдүгээр сард ашиглалтад оруулахыг Засгийн газар Зам тээврийн хөгжлийн яамны яамны дэд сайдаар ахлуулсан ажлын хэсгийн багт үүрэг болгосон.
Замыг ашиглалтад оруулах хугацаа богино учир 20.9 км замыг дөрөв хувааж нэг зэрэг тавьж эхлэхээр төлөвлөөд байгаа юм.
Хотын захиргаа 2017 оны есдүгээр сард зам тавих хэсгийн газрыг бүрэн чөлөөлсөн байдаг. Энэ хүрээнд иргэн, аж ахуйн нэгжүүдийн зөвшөөрөлтэй 82, зөвшөөрөлгүй 38, зар сурталчилгааны 60 самбар, нийт 180 обьектыг чөлөөлж, нөхөн олговорт нэг тэрбум гаруй төгрөг зарцуулжээ.
Түүнчлэн замыг ашиглалтад орох хүртэл замын хойд талын шороон хэсгээр түр зам гаргаж, Налайх, Хонхор, Баянзүрхийн товчоо орчмын оршин суугчид болон нийтийн тээврийн хөдөлгөөнийг нэвтрүүлэх юм. Мөн Улаанбаатар хотоос зүүн болон өмнө зүг явах, хот руу орох, дайран өнгөрөх тээврийн хэрэгслийг Төв аймгаар дамжин өнгөрүүлэхээр төлөвлөөд байгаа аж.
Сэтгэгдэл бичих