Дэлхийн сэтгэцийн эрүүл мэндийн өдөр – “Сэтгэцийн эрүүл мэнд бол хүн бүрийн эрх”

Жил бүрийн 10-р сарын 10-нд дэлхий нийтээрээ “Дэлхийн сэтгэцийн эрүүл мэндийн өдөр”-ийг тэмдэглэн өнгөрүүлдэг бөгөөд энэ жилийн уриаг Дэлхийн Эрүүл Мэндийн Байгууллага (ДЭМБ) “Сэтгэцийн эрүүл мэнд бол хүн бүрийн эрх” гэж зарлалаа.Энэ өдрийг тэмдэглэх гол зорилго нь

• Сэтгэцийн эрүүл мэндийн талаарх нийгмийн ойлголтыг нэмэгдүүлэх

• Гадуурхал, нэр хоч өгөхийг багасгах

• Хямралтай, стресст орсон иргэдэд дэмжлэг үзүүлэх орчныг бий болгох

• Залуучууд, хүүхдүүдийн дунд сэрэмжлүүлэг болон сэтгэл зүйн боловсрол түгээх

Сүүлийн жилүүдэд дайны бүс нутгууд, эдийн засгийн дарамт, цахим стресс, ажлын ачаалал, ганцаардал, цахим хүчирхийлэл зэрэг шалтгаанаар сэтгэл зүйн асуудалтай иргэдийн тоо эрс нэмэгдсэн. ДЭМБ-ын мэдээллээр:

• Дэлхий дээр 4 хүн тутмын 1 нь амьдралынхаа нэг үед сэтгэцийн эрүүл мэндийн асуудалтай тулгардаг. Гэсэн ч тэдний 70 хувь нь эмчилгээ, зөвлөгөө авах боломжгүй үлддэг

Манай улсад ч мөн сэтгэл зүйн эрүүл мэндийн үйлчилгээний хүртээмж, нээлттэй ярилцах соёл хангалтгүй хэвээр байна. Сэтгэл гутрал, түгшүүртэй иргэд нэмэгдэж буй ч эмчид хандах нь бага, шошголох хандлага хэвээр байгаа нь тулгамдсан асуудал болж байна.

🎗 Уриалга:

• Сэтгэцийн эрүүл мэндээ биеийн эрүүл мэндийн адил чухалчилъя

• Хэн нэгэнд тусламж хэрэгтэй байж магадгүй – сонсож, ойлгож, дэмжицгээе

• “Зүгээр дээ, чи давна” гэж хэлэхээс илүүтэй мэргэжлийн тусламж санал болгох нь хамгийн зөв дэмжлэг юм