Дональд Трампын засаг захиргаа АНУ-ыг НҮБ-ын Боловсрол, шинжлэх ухаан, соёлын байгууллага болох ЮНЕСКО-гоос гаргах үйл явцыг эхлүүлсэн тухай Цагаан ордны цахим хуудсанд мягмар гарагт буюу өчигдөр мэдэгджээ.
‘ЮНЕСКО-гийн үйл ажиллагаанд цаашдаа оролцох нь АНУ-ын үндэсний эрх ашигт нийцэхгүй. Тус байгууллага нь олон улсын хөгжлийн асуудалд глобалист үзэл суртлыг эн тэргүүнд тавьж байгаа нь Америк уриа бүхий манай гадаад бодлоготой зөрчилдөж байна’ гэж тус мэдэгдэлд дурджээ.
ЮНЕСКО-гийн ерөнхий захирал Одри Азуле хариу мэдэгдэл гаргаж, АНУ-ын гаргасан шийдвэрт харамсаж буйгаа илэрхийсэн байна. Тус байгууллага ийм нөхцөл байдал үүсэж болзошгүйг урьдчилан тооцож байсан хэдий ч Цагаан ордны энэ шийдвэр нь юуны түрүүнд АНУ-д хэрэгжиж буй соёлын хөтөлбөрүүдэд сөргөөр нөлөөлнө гэлээ. ЮНЕСКО-гийн нийт төсвийн 8 хувийг АНУ бүрдүүлдэг гэдгийг Азуле мөн дурдсан байна.
Д.Трамп Ерөнхийлөгчийн бүрэн эрхийн эхний хугацаандаа АНУ-ыг ЮНЕСКО-оос гаргах шийдвэрийг гаргаж байсан бол тухайн үед Цагаан ордон энэхүү шийдвэрийг Израилын эсрэг чиглэсэн тус байгууллагын бодлогоос үүдэлтэй гэж тайлбарлаж байжээ. 2021 онд энэхүү шийдвэрийг Жо Байден цуцалж байсан юм. Юнескогоос АНУ улс гарч, цаашид үндэсний бодлогодоо хөтлөгдөн явах нь ээ.
Сэтгэгдэл бичих