Л.Оюун-Эрдэнэ: Хариуцлагагүй зээлдэгчдийн зээлийг Засгийн газар төлөхгүй гэлээ

Засгийн газрын өнөөдрийн хуралдаанд Хөгжлийн банкнаас олгосон нийт 75 орчим зээл, 66 зээлдэгчийн мэдээлэлд дүгнэлт гаргаж танилцуулжээ. Энэ талаар Ерөнхий сайд Л.Оюун-Эрдэнэ байр сууриа илэрхийллээ. Тэрээр ‘Монгол Улсын Засгийн Хөгжлийн банкны зээлийг хоёр хувааж үзнэ. Шинэ сэргэлтийн бодлогын хүрээнд Хөгжлийн банкыг татан буулгахгүй, дампууруулахгүй. Мөн Засгийн газар хариуцлагагүй зээлдэгчийн өмнөөс зээлийг төлөхгүй. Харин цаашид Хөгжлийн банк эксим банк буюу экспорт, импортыг дэмждэг олон улсын жишгийн дагуу ажиллах хэрэгтэй. Харамсалтай нь үүсгэн байгуулагдсан цагаасаа хойш банк шиг биш харин сан, арилжааны банк эсвэл хадгаламж зээлийн хоршоо ч юм шиг тодорхойгүй байсаар ирсэн. Үүний үр дүнд 3.2 их наяд төгрөг хүүгийн багцын үлдэгдэл болж 55.3 хувь нь буюу 1.8 их наяд төгрөг чанаргүй зээлийн ангилалд орсон байна. Засгийн газар хоёр түвшинд авч үзнэ гэдэг нь нэгдүгээрт, зориулалтын дагуу ашиглагдсан зээлээр хэрэгжиж байгаа төсөл цар тахлын улмаас тасалдсаныг нь хэвийн гэж үзнэ. Хоёрдугаарт, улс төрийн нөлөөлөл ашиглаж, зээлээ зориулалтын бусаар өөр зүйлд ашиглаж, барьцаа хөрөнгө хангалтгүй зээл бий. Мөн шүүхэд шилжүүлж маргаан үүсгэсэн нь ч бий. Эдгээрээс болж баялаг бүтээгчдийн нэр хүндийг унагасан, улсын хөгжилд чухал хувь нэмэр оруулах ёстой хөгжлийн банкны зарим алдагдуулсан нөхөдтэй хатуу арга хэмжээ авах болно. Экзим банк буюу илүү том түвшинд зээл гаргадаг, мега төслүүдэд зээл олгож, санхүүжүүлж байж Монгол Улс эдийн засгийн хувьд илүү бэхжих боломжтой. Бидний хувьд Хөгжлийн банк байгуулагдсан 2011 оноос хойш бүх хэргүүд, дээрх асуудлуудыг Эрүүгийн хуулийн дагуу мөнгө угаах гэмт хэргээр шалгаж өгөх хүсэлтийг Ерөнхий прокурорт гаргасан. Зээл зөрчигдсөн гэдэг асуудал ихэнх нь иргэний хуулиар, 2011 онд буюу хөөн хэлэлцэх хугацаа дууссан гэх шалтгаанаар мултарч үлдэх боломжтой учир энэхүү зүйлчлэлийг өөрчлөөд энэ бол зээл биш харин мөнгө угаах гэмт хэрэг, улсын  татвар төлөгчдийн санхүүжилтэд ноцтой хохирол учруулсан гэсэн агуулгаар бичиг хүргүүлсэн. Зарим зээлдэгчийн хөрөнгийг битүүмжилж байна. Үүнийг баялаг бүтээгчдийн эсрэг хийж байгаа үйлдэл гэж ойлгож болохгүй, харин ч тэдний төлөө, цаашдаа бизнесийн чөлөөт өрсөлдөөнийг бий болгох, хувийн хэвшлийн төлөө, Хөгжлийн банк зөв ажилладаг байхын төлөө хийж байна. Жагсаавал 15 хүрэхгүй хүн л 1,7 их наяд төгрөгийн голлох зээлдэгч байгаа юм. Шаардлагатай бол зарим үл хөдлөх хөрөнгийг дуудлага худалдаагаар борлуулж, хохиролгүй болгох олон улсын зарчмын дагуу шийдвэрлэнэ. Тиймээс Хөгжлийн банктай холбоотой асуудлыг Эрүүгийн хуулийн дагуу шийдвэрлэнэ’ гэлээ.