Орон нутгийн хэмжээнд өнгөрсөн 7 хоногт 2045 обьектод зөвлөн туслах үйлчилгээ үзүүлж түр журмын хэрэгжилтэд хяналт тавьсан. Шалгалтаар 4302 зөрчил илрүүлж 47.3 хувийг нь газар дээр нь арилгуулжээ. Орон нутгийн худалдаа үйлчилгээний байгууллагуудад ажилтан, үйлчлүүлэгчдийн биеийн халуун хэмжээгүй QR код байршуулж бүртгээгүй сэжигтэй тохиолдлыг түр саатуулан тусгаарлах өрөөгүй, хүн хоорондын зай барих тэмдэглэгээ хаалт байршуулаагүй, цэвэрлэгээ халдваргүйжүүлэлтийг тогтмол хийгээгүй гэх мэт нийтлэг зөрчил илэрч байна.
Нийслэлийн хэмжээнд аж ахуй нэгж, байгууллага, иргэн шалгалтанд хамрагдаж 11 хуулийн этгээд 21 иргэнд 14.1 сая төгрөгийн торгууль ногдуулж 10 газарт хугацаатай албан шаардлага өгчээ. Мөн хадгалалтын горим алдсан, хаяг шошгын шаардлага хангаагүй хүнсний бүтээгдэхүүнийг буцаан татуулж устгалд оруулсан байна.
Вакцинжуулалт:
Хөдөө орон нутгийн хэмжээнд хяналт шалгалтад хамрагдсан дархлаажуулалтын цэгүүдэд нэг чигийн урсгалгүй, спиртэн суурьтай гар халдваргүйжүүлэх бодисоор хангагдаагүй, нүүрний хаалтны нөөцгүй зэрэг дутагдал илэрсэн байна. Түүнчлэн тарилгын явцад судас таарсан, тариур шаардлага хангаагүй зэрэг шалтгаанаар дөрвөн аймагт 10 хүн/тун Вероцелл вакцин устгагдсан байна.
Нийслэлийн хэмжээнд дархлаажуулалтын 21 цэгт хяналт шалгалт хийж найман зөрчил илрүүлэн, зөрчлийг арилгуулж мэргэжил арга зүйн зөвлөгөө өгчээ. Шалгалтаар иргэдийн халууныг хэмжээгүй нэг удаагийн халад шаардлага хангаагүй, гар халдваргүйжүүлэх уусмал хүрэлцээгүй, хог хаягдлын сав байхгүй, цэгийн урсгал хөдөлгөөнийг буруу зохион байгуулсан, хүлээлгийн өрөө болон ажиглалтын өрөөг нэг дор зохион байгуулсан хүн хоорондын зай бариулаагүй зэрэг зөрчлүүд илэрсэн байна.
Сэтгэгдэл бичих