Прага хотын одон орны цаг буюу Орлой хэмээн нэрлэгдэх эртний гайхамшигт цагийг 1410 онд анх суурилуулжээ. Энэ цаг нь дэлхийн хамгийн эртний хирнээ одоо ч ажилласаар байгаа гурван цагны нэг юм. Тэрээр Дэлхийн хамгийн эртний одон орны цаг Прага хотод байрладаг. 600 гаруй жилийн настай, одоо хүртэл ажилладаг юм. Орлой цаг нь гурван үндсэн бүрэлдэхүүнтэй. Нар, сарны байрлалыг дүрслэн үзүүлэх одон орны диск, “Бурхны сургааль айлдагчийн алхалт” буюу цаг тутамд хөдлөх бурхны сургаал айлдагчид болон үхлийг араг ясаар дүрсэлсэн дүрсүүд, сар бүрийг дүрсээр харуулах хуанлигаас бүрддэг аж. Орлойн механик цагийг Каданы цагчин Микулаш, Карловын их сургуулийн одон орон, математикийн шинжлэх ухааны профессор Ян Шиндел нар бүтээжээ.
Энэ цаг нь XIV, XV зууны үед бүтээсэн хамгийн адармаатай цагнуудын нэг. Орлойн цаганд 1490 онд хуанлийн диск, уран барилгын чимэглэлийг нэмж суурилуулжээ. Цагчин Ян Таборский 1552 онд энэ цагийг сэргээн засварлажээ. Тэр үеэс хойш Орлойн цаг нь олон удаа зогсож, засварчид ч цөөнгүй удаа засварласан гэдэг.
Чарльзын гүүр, Венсесласын талбайн хооронд орших Хуучин хотын талбайн эргэн тойронд уран барилгын түүхэн дурсгал болох Одон орны цаг, Гэгээн Николасын сүм, Хуучин хотын Захиргааны байр, эртний орд харш зэрэг гоёмсог барилгууд байдаг. Талбай X зууны үед бий болсон бөгөөд Европын худалдаачдын явдаг замын уулзвар буюу барааны зах байжээ.
Энэ том талбайг эрт дээр үеэс янз бүрээр нэрлэдэг байсан бөгөөд XIX зууны сүүлч үеэс Хуучин хотын талбай гэж нэрлэх болсон аж. Талбайн эргэн тойрны барилга XII, XIII зууны үеэс баригдаж эхэлсэн бөгөөд романы, готийн уран барилгын хэв маяг зонхилдог юм.
