Вьетнамын нийслэл Хо Ши Минь хотод халаасны хулгайн хэрэг үйлдсэн Монгол Улсын иргэн Л.Түвшинтөгс /1999/ , Г.Чинзориг /1987/ нарыг энэ сарын 4-ны өдөр баривчлан саатуулжээ. Тус хотын цагдаагийн хэлтэст мөн Монгол улсын иргэн О.Өнөрболд /1996/, Г.Шинэбаяр /1994/ нар халаасны хулгайн хэргээр байцаагдан шалгагдаж байгааг эх сурвалжийн мэдээлэлд дурджээ.
- Л.Түвшинтөгс , Г.Чинзориг нар нь долдугаар сарын 27-ны өдөр Хо Ши Минь хотын нэгдүгээр дүүргийн нутаг дэвсгэрт тус хотын оршин суугч Т, Х нарын цүнхнээс таван сая вьетнам дон, банкны карт, бусад бичиг баримт бүхий хэтэвчийг нь хулгайлжээ. Хохирогч, Вьетнам улсын иргэн Т, Х нар нь эхнэр нөхөр бөгөөд хэтэвчээ алдсанаа мэдэлгүй гэртээ харьсан байна. Удалгүй банкны картнаас нь 80 сая доны зарлага гарлаа гэх мессеж ирэхэд эд зүйлсээ хулгайд алдсанаа мэдэж цагдаагийн байгууллагад ханджээ.
Хэрэгтнүүдийг хяналтиын камерын тусламжтайгаар илрүүлсэн ба тэд хулгайлсан банкны картнаас их хэмжээний бэлэн мөнгө гарган авч, үнэт эдлэл /алтан ээмэг, бөгж, зүүлт/ худалдан авсан байсныг илрүүлсэн байна. Хяналтын камерт хэрэгтнүүд хохирогчийн хэтэвчнээс бэлэн мөнгө болон банкны картыг нь аваад бусдыг нь хаяж байгаа нь бичигджээ.
Үнэт эдлэлийн дэлгүүрээс гараад түрээсийн мотоциклоор өөрсдийн амьдардаг байр руу явж буй нь ч хяналтын камерт бичигдсэн байна. Мөрдөн шалгах ажиллагааны явцад дээрх Монгол улсын иргэд тус улсад бүлэглэн хулгай хийдэг байсан ба аяллын визээр нэвтэрч, хамтдаа байр түрээслэн амьдардаг байжээ. Үүнээс өмнө өнгөрөгч 2019 онд Вьетнам улсад халаасны хулгайн гэмт хэрэгт Монгол Улсын иргэд холбогдсон тохиолдол хэд хэд гарч байсан ба 20 гаруй монгол хүн тус улсад энэ төрлийн гэмт хэрэгт холбогдоод байна.
Эх сурвалж: BAOMOI.COM