Гар ариутгагч уусны улмаас хүмүүс эрүүл мэндээрээ хохирч, зарим нь бүр амиа алдсан хэргүүд гарсан талаар АНУ-ын Өвчний хяналт, урьдчилан сэргийлэх төвөөс мэдээлжээ.
Тодруулбал, гар ариутгагч уусан дөрвөн хүн нас барсан бөгөөд зарим хүмүүсийн нүдний хараанд нь өөрчлөлт орох, таталт өгөх шинж тэмдэг илэрсэн байна. Коронавирусийн цар тахлын үеэр гар ариутгагчийг хаанаас ч олж авах боломжтой ч ууж залгиж болохгүй, хүний эрүүл мэндэд нэн аюултай гэдгийг Өвчний хяналт, урьдчилан сэргийлэх төвөөс анхаарууллаа.
44 настай нэг эрэгтэй эмнэлэгт хүргэгдэхээс хэд хоногийн өмнө гар ариутгагч уусан тухайгаа хэлсэн байна. Тэрбээр метанолын гүн хордлогод орж, эмнэлэгт зургаан хоног хэвтэн эмчлүүлсэн ч бүрэн хараагүй болжээ.
Тавдугаар сараас зургаадугаар сарын хооронд тус улсын Аризона болон Нью Мексико мужид насанд хүрсэн 15 хүн алкохолийн хольцтой гар ариутгагч уусны улмаас метанолын хордлогод орж эмнэлэгт хүргэгдсэн тухай тус байгууллагаас мэдээлжээ. Нью Мексико мужид л гэхэд гар ариутгагч уусны улмаас гурван хүн нас барж, нэг хүн хараагүй болсон байна. Судлаачид гар ариутгагч уусан 21-65 насны 15 хүнийг эмнэлэгт хүргэгдсэн тухай тайландаа дурджээ. Тэдний зургаа нь таталт өгч, гурав нь харааны бэрхшээлтэй болжээ.
Бага насны хүүхэд мэдэхгүйгээсээ эсвэл санаандгүй байдлаар гар ариутгагч ууж болох ч насанд хүрсэн хүн яагаад уугаад байдгийн учрыг мэдэхгүй байна гэжээ. Алкохолийн найрлагатай учраас магадгүй согтууруулах ундааг орлох бүтээгдэхүүн болно гэж бодсон юм болов уу гэсэн таамгийг дэвшүүлсэн байна.
АНУ-ын Хүнс, эмийн албанаас гар ариутгагчинд агуулагдаж байдаг метанол хэмээх бодисын талаар олонтаа анхааруулсан бөгөөд этанолоос метанол нь илүү хортой ажээ.
Эх сурвалж: CNN
