Өнгөрсөн долоо хоногт Завхан, Баянхонгор аймагт тарваган тахлын сэжигтэй хоёр тохиолдол бүртгэгдсэн. Энэ бүгдэд ЗӨСҮТ-ийн баг голомтод ажиллаж, эхний шинжилгээг авахад хариу сөрөг гарсан. PCR нарийвчилсан шинжилгээний хариу мөн сөрөг гарлаа.
Ялангуяа Завхан аймгийн иргэний хувьд өвчтөн аймгийн төвд эмнэлэгт хэвтсэн. Гэртээ найман хүнтэй хавьтал болсон учир хавьтал болсон бүх хүнд PCR шинжилгээ хийлгэхээр өнөөдөр сорьц ирж байна.
Мэргэжлийн байгууллагаас хэлж анхааруулсаар байтал 30 гаруй насны эмэгтэй, эрэгтэй хүмүүс тарваганы мах идсэн өгүүлэмжтэй, булчирхай цочих, гүйлгэж суулгах зэрэг клиникийн шинж тэмдэг илэрч байна.
Иргэдийн энэ мэт хариуцлагагүй үйлдлээс болж нэг хүний тарваган тахлын лабораторийн шинжилгээ, эмчилгээ, голомтод ажиллах мэргэжилтнүүдийн хамгаалах хувцас хэрэгсэл зэрэг улсаас 100-гаад сая төгрөгийн зардал гарч байна гэж ЭМЯ-ны Шуурхай удирдлагын газрын дарга Д.Нарангэрэл мэдээллээ.
Коронавирусийн халдварыг эмчлэх, халдвараас сэргийлэх чиглэлээр ажиллаж байгаа энэ онцгой үед иргэд хариуцлагатай байхыг анхааруулж байна.
