Тагнуулын ерөнхий газар, Цагдаагийн ерөнхий газар зэрэг хуулийн байгууллагууд хамтран өнгөрсөн шөнө гүйцэтгэх ажил явуулж, цахим луйврын хэрэг үйлдсэн байж болзошгүй 500 гаруй хятад иргэнийг саатуулан, баривчилсан билээ. Гүйцэтгэх ажлыг өчигдөр /2019.10.29/ 21:00 цагийн үед эхлүүлж, шөнөжин үргэлжилсэн юм.
Баттай эх сурвалжийн мэдээлснээр дээрх иргэдийг удирдан зохион байгуулж байсан гэх дөрвөн иргэнийг өнгөрсөн шөнө мөн саатуулсан байна. Хуулийн байгууллагууд саатуулсан иргэдтэй холбоотойгоор их хэмжээний мөнгөний эх үүсвэр, гарал үүслийг тогтоохоор ажиллаж байгаа бөгөөд тэднийг санхүүгийн луйвар, залилан, хувийн мэдээлэл хулгайлсан гэх хэрэгт холбогдуулан шалгаж эхэллээ.
Сануулахад, саатуулсан хятад иргэдийг СБД-т байрлах “UNION building”, БЗД-т байрлах “Амар”, “Ориентал”, БГД-т байрлах “Кентавр” зочид буудлаас баривчилсан ба эдгээр дөрвөн газраас 10 мянга гаруй гар утас, 1000 гаруй өндөр үзүүлэлттэй компьютер хураан авсан гэх мэдээлэл бий.
Түүнчлэн дээрх иргэдийг Монгол Улсад “Жуулчны виз”-ээр нэвтэрсэн гэх мэдээллийг эх сурвалжаас бид аваад байна. Энэ төрлийн визийг Дипломат төлөөлөгчийн газар, Өргөмжит консул олгох эрхтэй байдаг бөгөөд гадаадын иргэдийн бүртгэлд хамрагддаггүй юм байна. Тухайн иргэд Монгол Улсын визийг Хөх хот эсвэл Эрээн хотод байрлах Консулын газраас авсан байх магадлалтай бөгөөд эх сурвалжийн мэдээлснээр бол Хөх хотоос 30 хоногийн виз авч, Монгол руу ирсэн ба энэ төрлийн визийг 30 хоногоор нэг удаа сунгах боломжтой байдаг аж. Визний асуудлаар Монгол Улсын Гадаад харилцааны яамнаас одоогоор албан ёсны мэдээлэл өгөөгүй байна. Баривчлагдсан иргэд Монгол Улсад хэзээ ирсэн, визний хугацаа хэтрүүлсэн эсэхийг шалгалтаар нэг бүрчлэн тогтоохоор ажиллаж байна.
Зарим эх сурвалжийн ярьсанаар баривчлагдсан хүмүүсээс хураасан олон тооны утас, өндөр үзүүлэлт бүхий компьютерийг Монголын зах зээлээс худалдаж авах боломжгүй тул хилээр хэрхэн оруулж ирсэн нь анхаарал татаж байна. Тиймээс хил, гаалийн байгууллагуудыг хамруулсан нэлээд өргөн хүрээний шалгалтын ажлыг эхлүүлэхээр болжээ.
Сэтгэгдэл бичих