Монгол Улсын Ерөнхийлөгч Ухнаагийн Хүрэлсүх АНУ-ын Чикаго хотод ажиллах үеэр Монголын буддын шашин, соёл, боловсролын хөгжилд оруулсан хувь нэмрийг нь үнэлж, гавж, доктор Д.Лувсанжамцад Монгол Улсын Соёлын Гавьяат Зүтгэлтэн цол хүртээж, цол, тэмдгийг нь гардууллаа.
Д.Лувсанжамц Монголын буддын шашин, соёл, боловсролын салбарт 30 гаруй жил ажиллахдаа шашны байгууллагын хөгжил, сүм хийдийн зохион байгуулалт, лам хуврагуудын боловсрол, ёс зүйг дээшлүүлэх, үндэсний шашин, соёлын өвийг хадгалан хамгаалах чиглэлээр олон ажил санаачлан хэрэгжүүлжээ.
Тэрээр Монголын Бурханы Шашинтны Төв Гандантэгчэнлин хийдийн Удирдах зөвлөлд ажиллахдаа 3 хот, 21 аймаг, 200 гаруй сумын 190 гаруй сүм хийдэд судалгаа хийж, Тэргүүн лам нарын зөвлөлийг шинэчлэн байгуулах, холбогдох дүрэм, баримт бичгийг боловсронгуй болгох ажлыг санаачлан хэрэгжүүлсэн байна. Мөн шашны байгууллагын үйл ажиллагаанд нэгдсэн шаардлага, хэм хэмжээ тогтоох зорилгоор “Бурханы шашны хийд оронд тавих шаардлага” стандартыг боловсруулжээ.
Түүнчлэн түүхэн дурсгалт сүм хийд, шашин, соёлын өвийг хамгаалах, уламжлалт хийдийн үйл ажиллагааг байгальд ээлтэй шийдэлтэй хослуулах зорилгоор нарны эрчим хүч ашигласан эко загвар хийдийг алслагдсан орон нутагт бий болгон хөгжүүлэх ажлыг санаачлан хэрэгжүүлсэн юм.
Гавж Д.Лувсанжамц Дээрхийн Гэгээн IX Богд Жавзандамба хутагтын чанзоваар ажиллаж, Хутагтыг Монголд залах, Монголын буддын шашны тэргүүнд өргөмжлөх түүхэн үйл хэрэгт оролцсон юм. Энэ хүрээнд Очирваань, Манзушири бурхдыг бүтээн залах, IX Богдын лагшин эрдэнийг шүтээнчлэн оршоох, намтар, түүхийн бүтээлүүдийг эрхлэн хэвлүүлэх зэрэг шашин, соёлын өвийг хадгалан хамгаалах ажлыг зохион байгуулсан.
Мөн буддын шашны уламжлалт мэдлэг, гүн ухаан, хүмүүнлэгийн үнэт зүйлсийг орчин үеийн хэлбэрээр олон нийтэд хүргэх зорилгоор “Bodicast” подкаст, “Samsara” төслийг санаачлан үүсгэн байгуулж, буддын гүн ухаан, ёс суртахуун, боловсрол, шинжлэх ухаан, нийгмийн асуудлаар 300 гаруй контент бэлтгэн олон нийтэд хүргэжээ.
Тэрээр АНУ-д Монголын Буддын соёлын төвийг үүсгэн байгуулж, хилийн чанад дахь монголчуудын шашин, соёл, үндэсний өв уламжлалыг хадгалан хөгжүүлэх, хүүхэд залуу үед өвлүүлэн уламжлуулахын зэрэгцээ олон улсын нэр хүндтэй буддын шашны багш, эрдэмтдийн номын айлдвар, сургалт, соёл, хүмүүнлэгийн арга хэмжээг зохион байгуулж, Монголын буддын шашин, соёлыг олон улсад сурталчлан таниулах чиглэлээр ажиллаж байна.
Сэтгэгдэл бичих